Julie: Taamaasioqqissanngilanga

Ullumi Allstarsimi finalertoqassaaq. Pissangasoqaqaaq, kalaallilli erinarsoqatigiit Nuummi tikilluaqqulluassamaarneqalereerput.

Siullermik pingasuupput. Taava marluinnanngorput. Unnugulu Allstarsimi ajugaasut toqqarneqassapput. Ass.: Henrik Ohsten.

- Allstars misigisaq nuannersorujussuusimavoq pinngitsoorusunnavianngisara. TV-kulli aliikkusersuineq taamaattoq uannut tamaviaarnarsimaqaaq, taamaasioqqissanngilangalu. Erinarsortartuunera aallunniarpara ukiarulu tusarnaartitseqattaarlunga angalassaanga. Kialli ilisimavaa ukiut marluk-pingasut qaangiuppata qanoq pisoqarumaarnersoq?

Taamatut Julie Berthelsen Ekstra Bladet-imut ullumi saqqummersumut oqarpoq, erinarsortartullu tusaamasap isertuutinngilaa kalaallit erinarsoqatigiit 22-it aqunnerat tamaviaarnarsimaqisoq. Maannali naammassingajalerpoq. Unnugu finalertoqassaaq nuannattoqassamaaqalunilu.

Qanorluunniit angusaqaraluarunik erinarsoqatigiit ataasinngorpat Nuummut tikissapput, tassani Katuaq, Kalaallit Nunaanni Takornariaqarnermut Inuussutissarsiornermullu Siunnersuisoqatigiit aamma Air Greenland nuannersumik, akeqanngitsumik Inussivimmi tusarnaartitsinissaq isumagisimallugu. Aaqqissuussisut kikkut tamaasa kajumissaarpaat tusarnaariaqqullugit, tusarnaartitsinerlu nal. 18.30 aallartissaaq borgmester Asii Chemnitz Narupip oqalugiarneranik.

Erinarsoqatigiit Nuummut tikissapput ataasinngorpat ullaap tungani, Krissie Berthelesn Winbergillu, NanuBørn-imeersup, neriuutigaa innuttaasut amerlasuut nalunaaqutaq 11.00 erinarsoqatigiinnik mittarfimmut tikilluaqqusiartorumaartut.

Julie AllStars finalimi ajugaassappata akissarsiassat 250.000 koruunit NanuBørnimut tunniunneqassapput.

Sermitsiaq.ag unnugu Københavnimi erinarsoqatigiit unammineranni najuutissaaq. Taamaattumik qupperneq nittartagaq alapernaaguk.

Powered by Labrador CMS