Air Greenlandimi ataatsimiinneq tupannartoqanngilaq

Taamaallaat qulartut soqutiginnittullu ikittuinnaat pingasunngormat unnukkut Michael Binzerimik ataatsimeeqateqarput.

Facebook-gruppenmik

Oqaatigipallaannartigu: Ippassaq timmisartuutileqatigiit akigititaannik soqutigisaqartut Air Greenlandip pisortaaneranik Michael Binzerimik ataatsimeeqateqarnerat ilimagineqartutuut kissaatigineqartutuullu pinartoqanngilaq. Aamma tupaallannartoqanngilaq.

Taamaattoq Facebook-gruppimik »Vi er trætte af Air Greenlands høje billetpriser« pilersitsisup Pilu Skifte Grønvoldip ataatsimiinnermi angusat iluarisimaarpai, naak Michael Binzer maannangaaq akikinnerusumik timmisartortoqarnissaanik neriorsuinngikkaluartoq.

- Sooq nunatsinni timmisartornerup taama akisutigineranik nassuiarneqarneq soqutiginarpoq. Soorunami uanga allat assigalugit neriuutigisimagaluarpara billitsit akikinnerulernissaat, kisianni aamma pivisusorsiortariaqarpoq, Pilu Skifte Grønvold Sermitsiaq.AG-mut oqarpoq.

Ippassaq unnukkut takkuttut 20-t missat peqatigalugit Air Greenlandimi ataatsimeeqataavoq. Taakku affangajai Air Greenlandimeersuupput.

Pilu Skifte Grønvoldip neriuutigisimagaluarpaa inuit 30-t missaat takkunnissaat, Michael Binzerillu kissaatigalugu inuit 150 missaat takkunnissaat, Facebookimi gruppimi inuit 3700 ilaasortaapput.

Powered by Labrador CMS