Aallartitat 44-t tikeraartut
Kommuneqarfik Sermersooq tallimanngorpat juunip 4-anni nunat assigiinngitsut aallartitaanik 44-nik Danmarkimi najugalinnik pulaarteqassaaq.
Tikeraartit ilagaat USA-p Danmarkimi aallartitaa Laurie S. Fulton, siorna Kommuneqarfiup allaffeqarfiani pulaartoq, sermersooq.gl allappoq.
Nunat assigiinngitsut aallartitaat 44-t Kalaallit Nunaannut ullumi sisamanngornermit tikeraartussat, tallimanngorpat nal. 10.30 Kommuneqarfiup allaffeqarfianut pulaassapput, tassanilu borgmester Asii Chemnitz Narupimit tikilluaqquneqassapput.
Tikeraat katillugit 46-upput, ilaat 36 nunat allat Danmarkimi aallartitaraat, arfinillit Udenrigsministeriaqarfimmeersuullutik, ataaseq Damarkimi Kalaallit Nunaata Sinniisoqarfianeersuulluni, ataaseq nunatsinni nunanut allanut pisortaqarfimmeersuulluni kiisalu ataaseq Kalaallit Nunaanni takornariartitsisarfimmeersuulluni.
Nunanit allanit aallartitat ilaatigut nunanit ukunanngaanneersuupput: Australien, Burkina Faso, Finland, India, Mexico, Nepal, Saudi Arabien, Thailand, USA il.il. Nuummullu aqagu sisamanngornermi tikereersimassapput, ilaatigut Naalakkersuisut siulittaasuannit Kuupik Kleistimit Katuami tikilluaqquneqassallutik.
Tallimanngorpat Kommuneqarfiup allaffeqarfiani pulaareerunik suliffeqarfiit assigiinngitsut pulaassavaat unnukkullu Udenrigsministeriaqarfik qaasaasoralugu neriarniartarfimmi Nipisami nerersuassapput, ilaatigut borgmester Asii Chemnitz Narup qaaqqusanut ilaassalluni.
Angalaqatigiit arfiningorpat Ilulissiassapput.