Siriusikkut angerlarput
Siriusimiit sakkutuut qimussertut tamarmik Daneborgimut uterput, qaammatini sisamani 20.000 kilometerit angalareerlugit, isorartussutsillu assigiinnarpaa Ækvatorikkut nunarsuup kaajallannissaata affaa ingerlaffigalugu
Tunup avannaani aamma upernarpoq.
Siriusimiit sakkutuut qimussimik angalasut tallimat maajip 30-ani Daneborgimi angerlarsimaffimminnut uterput, qaammatini arlalinni inoqajuitsumi angalareerlutik, taama nittartakkamini allappoq nunatsinni sakkutooqarfik Grønlands Kommando.
- Angutit aqqaneq marluusut ilaat qaammatit sisamat ingerlaneranni aatsaat immikkut takupput. Ikinngutit takoqqillugit nuannerpoq, tassanngaannaq seqinermik asinngarsimasunik umissuaqalersimasut palerluarsimasullu. Qaasuitsup unnuaata naalernerani Daneborg qimallugu qarsungaqalutik aallalernerminniit allaaneroqaat.
Qaammatip ingerlanerani aasarnissaanut piareersassapput, angalanissaminnut taquassanik poortuillutik, umiarsuarmillu ukiumut ataasiarluni assartuisartumut nassiussassat piareersarlugit, najugaqarfillu iluarsaallugu.
- Juulip qiteqqunnerani sakkutuut nutaat tikissapput, sakkutuutoqqallu angerlamut aallalernerminni qullinissaat pisussanngorpoq, ukiuni marlunni nunarsuarmi inuilaanerpaami nuannernerpaamilu kiffartuussereerlutik inunnut siuarsimasunut uteqqilerutunik, sakkutooqarfik allappoq.