Kulusuk innermik anitsisup arsakuinit eqqugaasinnaavoq
Islandimi qaqqaq innermik anitsisoq arsakaliortorujussuanngoqqippoq Kulusumullu timmisartortarneq eqqugaaratarsinnaavoq.
Danmarkimut uterlugulu timmisartuussisarneq pissusissamisut ingerlaqqilerpoq, Air Greenlandilli Kulusumut tassangaanniillu timmisartuussisarnerup qaqqap Eyjafjallajökull-ip innermik anitsinerata arsakuinit eqqugaaratasinnaanera aarleqqutigaa.
– Manna tikillugu tamanna ajornartorsiutiginngilarput, taamaattumillu arsakut akorngutiginatigit. Kulusuk eqqugaassabersoq nalugallarparput, arsakulli ingerlaarnerat nal. 18 paasisaqarfigeriarutsigu erseqqissumik oqarsinnaalissaagut, Jesper Kunuk Egede Air Greenlandimeersoq oqarpoq.
Innermik anitsineq uninngikkallassaaq
Islandimi silasiorfeqarfiup arsakut 7 kilometerit tikillugit portussusilimmut killeqarnerarpai. Nutaarsiassaqartitsivik Ritzau taama allappoq.
– Innermik anitsinik suli unileqqajanngikkallarpoq, silasiorfeqarfik ilisimatitsivoq.
Anorilli taamaakkallartillugit arsakut kujammut ingerlapput Irland Skotlandilu eqqorlugit, Danmarks Meteorologiske Intitut (DMI)-meersoq Jens Havskos Sørensen naliliivoq.
– Arsakut ulluni aggersuni kujammut ingerlaarallassagunarput. Ilimanarpoq Tuluit Nunaat Irlandilu eqquaajumaartut. Immaqalu aamma Kalaallit Nunaata kujataata kitaa, Jens Havskov Sørensen oqarpoq.
Anorili sapaatip akunnerata tulliani saqeqqippat Danmarkimi eqqugaaqqeratarsinnaassanerarpaa.
Ulluni kingullerni mittarfiit Skotlandiiittut, Irlandip avannaaniiytut Savalimmiuniittullu piffissap ilaani arsakut pissutigalugit matoqqatinneqartarsimapput.