Arsakut peqqutigalugit timmisartuussinissat taamaatipput
Kulusuk, Tasiilaq aamma Keflavik arsakut peqqutigalugit ullumi timmisartuussivigineqassangillat. Narsarsuaq sila peqqutigalugu eqqugaavoq.
Kulusuk timmisartuussivigineqartussatut akuerineqartutut tassaavoq zone 2, tassani timmisartut arsakulimmi atorneqartussatut tunisassiortumi pisortanillu akuerineqartussaallutik, kiisalu akunnerit pingasukkaarlugit boroskop atorlugu timmisartut motoorii misissorneqartartussaallutik.
- Air Greenland Dash 7-inut tunngatillugu zone 2-mi timmisartorsinnaavoq, taamaattorli qulimiguulinnik timmisartuussineq pisinnaannani, ilaasussammi tamarmik Tasiilamiipput Kulusummullu ingerlanneqarsinnaanngillat, Air Greenland tusagassiuutitigut nalunaarummi allappoq.
Narsarsuaq silarlummik aamma eqqugaavoq, taamaattumik timminissat tamarmik kinguartinneqarput.
Angalanermut sillimmasiisarfik attaveqarfigiuk
Air Greenlandip ilaasussat kajumissaarpai, arsakut peqqutigalugit kinguaattoorunik angalanermut sillimmasiisarfitsik attaveqarfigeqqullugu, ullumikkumiimmi Air Greenlandip angalasut arsakunik peqquteqartumik kinguaattoortut inissaqarnermut aningaasartuutaat akilertarunnaassavai. Taamaattoq tassani pineqanngillat Keflavikip Købehavnillu akornanni angalasut, taakkumi kinguaattoornerannut timmisartuussinerillu unitsinneqarnerannut atatillugu EU-mi peqqussut 261/04 atorneqartussaavoq.
Air Greenlandip angalasut arsakut peqqutigalugit angalanissaraluaminnik unitsitsisut periarfissippaai maajip 12-ata tungaanut bilitsissamik utertinnissaanut, bilitsi sorliunersoq apeqqutaatinnagu. Tassanili taamaallaat pineqarput angalaffissat arsakunik eqqugaasut, tassalu Nuuk-Keflavik aamma Nuuk-Kulusuk kiisalu Kulusuk-Tasiilaq.