Pilersuineq pitsaanerusoq ujartorneqarpoq

- Silaannaap allanngoriartornera peqqutigalugu siku sukkanerusumik aakkiartorpoq, tamannalu akulikinnerusumik umiarsuakkut pajunneqartarnitsinnik kinguneqartariaqarpoq. Qangaaniilli ukiumut marloriaannarluta umiarsuarmik pilersorneqartarnitsinnik aaqqissuussisimaneq nalileqqinneqartariaqarpoq, Illoqqortoormiuni Inuit Ataqatigiit immikkoortortaani siulittaasoq Juulut Danielsen isumaqarpoq.

Kissaatigaa nunatta sinneranituut nerisassanik peqqinnartunik nunatsinneersunillu pilersorneqarnerup pitsaanerulernissaa.

- Ullumikkut Islandimiit naatitanik paarnanillu nutaanik akisoqisunik pilersorneqarpugut. Iipili ataaseq 15 kroneqarpoq appelsiinarlu 20 kronit, taakkuli isertitakitsunit pisiarineqarneq ajorput. Taakku meeqqamik peqqinnartunik nerisaqarnissaat kissaatigaat, taamaaliorsinnaanngillalli akit qaffasippallaarnerat peqqutigalugu, Juulut Danielsen oqarpoq.

Isumaqarpoq innuttaasut peqqinnartumik ineriartornissaannut peqqinnartunik pitsaasunillu pilersorneqarneq pingaarnerpaat ilagigaat.

- Uagut isumaqarpugut (Illoqqortoormiuni IA, aaqq.) nioqqutissanik pitsaasunik peqqinnartunillu pisisinnaaneq tunngaviusumik pisinnaatiitaaffittut isigineqartariaqartoq.

- Pilersuisoq A/S aamma Royal Arctic Line A/S, Kommuneqarfik Sermersooq kiisalu Naalakkersuisut eqqartueqatigiittariaqarput, qanoq ililluni Illoqqortoormiut nioqqutissanik pilersorneqarnerat pitsaanerulerlunilu annertunerulersinnaanersoq eqaannerulerlunilu. Aamma isumaqarpugut Assartuinermut ataatsimiititaliarsuaq Tunumi ingammillu Illoqqortoormiuni pissutsinik misissueqqissaartariaqartoq, Juulut Danielsen oqarpoq.