Julie/Niarn AllStars - Nuuk Aalborgilu unammissapput
Illoqarfiit ikinngutigiit Nuuk Aalborgilu unammersuassapput tallimanngorpat AllStars TV2-kut ingerlaqqilerpat.
Aalborgimi FriStedet-ip pisortaa Jens Larsen isumaqarpoq tallimanngorpat Julie AllStars ingerlaqqikkumaartut.
- Juliep manna tikillugu Københavnermiut Århusermiullu sapinnginnamigit aamma Aalborg sapernavianngilaa, Aalborgimi innuttaasut Kalaallit Nunaannit tamarmik sisamariaammik amerlanerugaluartut, Jens Larsen oqarpoq.
Niarn-ip FriStedetimi Aalborgimi Grønlandskvarterimi inissisimasumi nipilersortarnini aallartissimavaa.
Ditte Klysner Sørensen, FriStedetimi sulisup Niarnillu erinarsoqatigiivini ilaasortap tallimanngorpat Jens Larsenip isumalluarnera isumaqatiginngilaa. Taassuma qularutiginngilaa Niarn AllStars tallimanngorpat ajugaassasut.
Jens Larsen aggustimi Nuummukassaaq, inuusuttunik nunat allamiorpassuarnik tunuliaqutalinnik ukiorpassuarni sullissinermini misilittakkaminik tunniussiartorluni. Aamma tappavani illoqarfiup immikkoortuani kalaallit ilaqutariit meerartaat sullittarsimavai.