Dronningi nersorniarneqartoq

Dronningi marlunngormat unnukkut Christiansborg Slot-imi qaaqqusaminik tikilluaqqusilluni skåleeqatigineqarami attortisimaarpalulluinnarpoq.

Dronningip tallimanngorpat 70-iliinissani sioqqullugu inuuissiornerminut qaaqqusani 375-it marlunngormat unnukkut Christiansborg Slot-imut tikilluaqqugamigit pissangarpalullunilu attortisimaartoq nalunanngilaq.

– Ukiorpassuarni sumit tamaniit inussiarnersumik asannittumillu pineqartarsimanera unnuk manna qujassutiginiarpara, dronning Margrethe qaaqqusani skåleeqatigigamigit oqarpoq.

Unnuup ingerlanerani eqqumiitsuliortut assigiinngitsut arlallit aliikkusersuipput. Ilaatigut Julie Berthelsen, Kim Larsen, Lis Sørensen, sir Cliff Richardt aamma Ørkenens Sønner.

Dronningip aamma Danmarkip avataaneersunik peqataasoqarnera nuanaarutiginerarpaa.

– Unnuk manna aamma Savalimmiuneersunik Kalaallit Nunaanneersunillu peqataasoqarnera nuannaarutigaara. Torshavn Nuullu ungasissorsuunngikkaluarput, sømilerpassuilli uannut ungasissorsuartut misinnartarput, dronningi oqarpoq.

Pilluaqqusisunut ilaalluni Folktengip siulittaasuaThor Pedersen aamma dronningimut oqalugiarpoq.

– Politikikkut oqallinnermi ilaatigut ullormiit ullormut pisut tunngavigalugit oqallittoqartarpoq. Tusagassiuutitigut oqallinnermi apeqqutit pingaarnerit pinnagit aviisit saqqaaniittut pullavigineqarpallaartarput.

– Piffissami pisoqarfioqisumi illit - tamatigut - tassaavutit Danmarkip oqaluttuarisaanera.

– Ukiorpassuit ingerlanerini illit ilaquttatillu tassaajuarsimavusi uagutsinnut pingaaruteqarluinnartut - illillu qallunaat naalagaaffiannut katersuuffiuvutit: Danmarkimut, Kalaallit Nunaannut Savalimmiunullu, Folktingip siulittaasua ilaatigut taamatut oqarpoq.

Ullut aggersut inuuissiortoornermik malunnartitsiviussapput, tallimanngorpat unnukkut Fredens Slotimi nerersuarnermik naggaserneqassallutik.

Ritzau

Powered by Labrador CMS