Aqutsinermut unioqqutitsinermut pinngitsuutinneqarpoq
Peqqissaasut nunanit allaneersut akilerneqartarnerannut tunngatillu isumaqatigiissitsiniarnermik suliaq naammassivoq. Namminersorlutik Oqartussat piingitsuutinneqarput.
Peqqissaasunut isumaqatigiissummik unioqqutitsinerunngilaq sulisitsisullu aqutsinissamut pisinnaatitaaffianut akuliunnerunani, Namminersorlutik Oqartussat Hollandimiit peqqissaasunik atornitsitsinissartik kissaatigimmassuk.
Ukiup affaani suliarineqareerluni isumaqatigiissitsiniarnermi suliami immikkoortuni arfinilinni tunngaviatigut suliami Peqqissaasut Kattuffiata suliassanngortitaani ilaatigut 1 million kroninik akileeqqusillutik Namminersorlutik Oqartussat piingitsuutinneqarput, Namminersorlutik Oqartussat sinnerlugit tusagassiutitigut nalunaarummi André Guttesen allappoq.
Namminersorlutik Oqartussat ilaatigut tunngavilersuutigaat peqqissaasut naggataarutaasumik akeruitinnagit atorfnitsinneqannginnerannilu oqatsinik kulturimillu paasinninnissamut piareersaataasumik ilinniarnissamut akiliisinnaanermut piginnaatitaanermik.
PK-p nittartagaa naapertorlugu siumaqatigiissitsiniarnermi suliap aalajangiivigineqarnerata kinguneraa, nunanit allanit peqqissaasunut atorfinittussanut immikkut ittumik akiliuteqartoqarsinnaasoq. Taamaattorli isumaqatigiissutinik unioqqutitsineruvoq atorfinereernerup kingorna immikkut ittumik akiliuteqarnissaq. Tamanna novembarimi isumaqatigiinniarnerit nalaanili aalajangerneqarpoq.
Taassuma saniatigut PK Namminersorlutik Oqartussanut akiliissapput, aqutsinerannut pissusissamisuunngitsumik akuliussimanertik peqqutigalugu, kiisalu oqaloqatigiinnerit isumaqatigiinniarnerillu aqqutigalugit aaqqiiniarnissamut pinaasersimanerminnut atatillugu, kiisalu PK-p arlalitsigut ajuallatsitsisimaneranut tunngatillugu, taama tusagassiuutitigut nalunaarumminni allapput Namminersorlutik Oqartussat.