Katuaq sinneqartoorpoq

Kaaviiaartitat ikiligaluartut Katuami aqutsisut ukiumi angusat naammagisimaarpaat.

2009-mi kaaviiaartitat annikilligaluartut Katuami aqutsisut ukiumi angusat naammagisimaarpaat. Assi: Adam Mørk.

Katuap 2009-mut angusarai 105.000 kroninik sinneqartoorneq, 201.000 kronit sinneqartoorutissasut missingersuutiniillutik.

Assersuutigalugu 2008-mi 56.000 kroninik amigartoortoqarpoq, ukiumilu angusat aqutsisut iluarisimaarpaat.

Angusat ilaatigut missingersuutinut naleqqiullugit kaaviiaartitakinnermik sunnerneqarput, taassumallu saniatigut aningaasartuutit amerlanerusimapput, soorlu avataanit kiffartuussinissamik pisinerit, suliassat ilaasa allanik isumagineqarnerisigut,soorlu grafikeri, edb-mi kiffartuunneqarneq nalikilliliinerillu.

Katuap nalunaarutigaa aningaasartuutit teknikeqarnermut sulisunullu tungnasut killilersimaarniarneqarsimasut, tamannalu peqqutigalugu ukiumi angusat ajunngitsumik sunnerneqarlutik.

Katuap 2009-mi 25,2 million kronit kaaviaartippai, 2008-mi 26,9 millionit kaaviiaartillugit.

Namminersorlutik Oqartussat Kommuneqarfillu Sermersooq 2009-mi katillugit 9,4 million kroninik ingerlatsinermut tapiissuteqarput.

Katuami aqutsisut nalilerpaat 2009 ukiuusimasoq pissanganartoq, kulturikkut aaqqissuussani soorlu isiginnaartitsinerni qitinnermi, nipilersornerni eqqumiitsulianik saqqummersitsinerni allanilu pisut ataatsiakkaat naammaginertumik angusaqarfiullutik.

Katuami aamma filminik, workshopinik, pikkorissarnernik, isumasioqatigiinnernik, ataatsimeersuarnik ilassinninnernillu ingerlatsisoqarsimavoq.

Powered by Labrador CMS