Bruce Parry Qaanaami
BCC-mi TV-miittartoq Qaanaamiippoq piniartutut inuutisarsiuteqarneq silaannallu allanngoriartornera pillugu piviusulikkersaarummik filmilioriartorluni.
Qanittukkut KNR-TV aallakaatisassiani 'På opdagelse i Amazonas'-ni takuarput, Amerika kujallermi Amazonap kuussuani angalanerujussuanit aallakaatitani, tassani nunap inoqqaavisa inuuneranni akuuulluni, paasitillugu nunarsuup sinnerata inuunerat qanoq sunnertarneraat.
Maannakkut Issittoq sammilerpaa tassanilu nunap inoqqaavi. Aallakaatitaq piviusulikkersaarut 'Bruce Parry in the Arctic' (Bruce Parry Issittumi) ukiup ingerlanerani BBC.mi aallakaatinneqassasoq ilimagineqarpoq, taama sermitsiaq.ag-mut nalunaarpoq filmilioqataa Vicky Hinners Indus Filmineersoq, BBC-mut filimiliortartoq.
Pingasunngormat filmilioriat Qaanaamut tikipput, tallimanngorpallu ulluni arfineq poingasuni piniariaqataassapput, Qaanaamiit piniartut arfinillit illinersiorlugit.
– Issittumi inuuneq pillugu akunnerinik tallimanik takissuseqartumik piviusulikkersaarutinik aallakaatitassiorpugut, ilaatigut piniartut inuunerannik kulturiannillu imaqartumik. Aamma Uummannaliassaagut tassani aatsitassarsiorneq taassumalu inunnut suniuteqarnera pillugu aallakaatitassiorluta, kiisalumi aamma silaannaap allanngoriartornera kingunerisaalu, Vicky Hinners oqaluttuarpoq.
Oqaatigaa silaannaap allanngoriartornerata samminerani suut tamaasa tikinneqarsinnaasut sammineqassasut, aamma pitsaasortai. Aallakaatitassiani aamma takuneqarsinnaassaaq Kalaallit Nunaata siunissaa, naalakkersuinikkut, aningaasaqarnikkut isumaginninnikullu.
Maajip 6-ata tungaanut filmilioriat nunatsinniissapput.