Arsakunik nuissat silap kissakkiartorneranik unikaallatsitsissapput
Islandimi innermik anitsinikkut arsanik nuissat silaannatsinni seqineq taluaat - taamaalilluni siunissami silap allangoriartorneranut iluaqutaaluni nillernerulissagami.
Islandimi innermik anitsisumi arsakut aalarlu Europap avannaani silaannarmi qipissiatut uninngapput, seqinerlu talisimallugu. Piffissamilu agersumi tamanna nillernerulersitsissaaq - silap kissakkiartorneranut iluaqutaalluni, silap pissussaanut ilisimatuut oqarput.
- Europap avannaani qaammatini tulliuttuni marlussunni silap nillernerulernissaa ilimagisinnaavarput, innermik anitsisoqarsimanngitsuuppaat taamaassanngikkaluarluni, USA-mi Los Alamos National Laboratorymi silap pissusaanik ilisimatooq Sebastian H. Mernild oqarpoq.
Ilisimatuut paasisimavaat, annertuumik innermik anitsisoqartillugu ukiuni tullerni sila nillertinnerusartoq, arsakunik nuissat seqinermik talusisarmata.
Misissuinerit takutissimavaat 1991-mi Filippinerneni Pinatubo aamma Mexicomi 1082-mi El Chichon sakkortuumik anitsimmata nuanrsuaq gradinik marlussunnik nillernerulersimasoq.
Innermik anitsinerit allaat ungaseqisumut nunatsinnut sunniuteqarsimavoq, tamaalilluni sermersuup sivisunerusumik atasinnaanera qulakkeerlugu.
- Aputip sermillu aakkiartornerannut kiaap allanngorartarnera sunniueqartarpoq - innermimmi anitsinerup kingunerisaanik nillernerulerneratigut sermersuup aannera 30 procentimik annikillisimavoq, Sebastian H. Mernild oqarpoq.
Oqaatigiuminaappoq Islandimi innermik anitsisartup Eyjafjallajökilip anitsisera qanoq sakkortutigissanersoq. Sivitsoriartortillugu sakkortusiartortillugulu arsakut aalarlu silaannarmut ingerlasut annertusiartortarput.
- Tamannalu silap pissusaanut sunniuteqassaaq. Suli oqaatigiuminaappoq, siunissami Islandimi innermik anitsisoq qanoq annertutigisumik sunniuteqassanersoq, ilisimatooq oqarpoq.