Mittarfinni paatsiveerunneq - silaannarmi nipaassuseq
Islandimiit arsanik putsut Europap qeqqani mittarfiit amerlanerujuartortut matutippai. Nuanrsuarmi tamarmi ilaasussat untritillit tusintilikkaat eqqorneqarput.
Europap avannaata annersaani silaannakkut angallanermi paatsiveerunnersuaqarpoq. Silaannarli nipaaqaaq. Timmisartut uninngapput. Islandimi innemrik anitsinerup timminissaq pisinnaajunnaartipaa, silaannakkullu angallanneq siusinnerpaamik arfininngormat aatsaat aallarteqqissinnaavoq.
Mittarfinni matusuni kingullersaavoq Europami mittarfiit annersaasa tulliat Tysklandimi Frankfurt, piffissami aalajangersimanngitsumi matueqarluni arsakut peqqutigalugit. Tuluit Nunaanni silaannakkut angalaneq tamarmi arfininngornerup unnuaata tungaanut unitsinneqarpoq, pisortallu ilisimanngilaaq angallanneq qaqugu qanorlu annertutigisumik aallarteqqissanersoq.
Sisamanngormat Europap avannaanit mittarfissuit arlaqartut ilaatigut Parisimi Charles, Amsterdamimi Schiphol Londonimilu Heathrow Europami ulapaarfiunerpaasut matuneqarput.
Nunani avannarlerni timmisartumik angalaneq tamarmi aamma unitsinneqarpoq. Københavnimi Kastrupip mittarfiani arfininngornerup unnuaanut nalunaqutaq 02.00-mut timminerit tamarmik unitsinneqarput, piffissamilu aamma tassani Danmarkip silaannartaani angalaneq tamarmi aamma unitsinneqarluni.
Norgemi pisortat naatsorsuutigaat angallanneq aatsaat siusinnerpaamik arfininngornermi aallarteqqinneqarsinnaasoq, Sverigemili isumaluartoqarnerulaarluni. Tassani immaqa angallanneq aallarteqqinneqassaaq tallimanngornerup ingerlanerani.
Innermik anitsinermi arsakut nunarsuaq tamakkerlugu ajornarsorsiortitsiput. Amerikami avannarlermi, kangiani nunat Amerikamilu kujallermi timmisartuutileqatigiiffiit Europap avannaani mittarfinnut angalanissat tamaasa unitsippaat, oqarpullu Europamut timmissartuussinerit siusinnerpaamik arfininngorpat aatsaat pisinnaasut.
Atlantikoq qulaallugu timmisartuussinissat affaasa missaat tallimanngornermi taamaatiinnarneqarput, sapaatillu akunnerata naanerata kingorna aatsaat nalinginnaalernissaanissaat ilimanarpoq.
Ritzau