Tele upalungaarsimavoq
Telep imaatigut kabelimut stationeqarfiata Islandimi landeysandur-imiittup qarsunneqarsinnaanera ilimanarsinnaammat Telep Islandimi qaqqap innermik anitsinera malinnaaffigeqqissaarpaa. Qaqqap sermitalik innermik anitsiviusoq imaatigut kabelimut stationeqarfiup ungasippallaanngitsuaniippoq.
Tele Greenlandip Islandimi suleqataata Farice-p innermik anitsineq aallartimmalli imaatigut kabelimut stationeqarfiup eqqaani pissutsinik iisimatittuartarsimavaa.
Kuup qanittumiittup qarsutsisinnaanera pissutigalugu inuit qimarngussorneqarmata Farice stationeqarfimmi qarsutsisoqarsinnaanera upalungaarsimaffiginiarlugu iliuuseqarsimavoq. Entreprenørip stationiliornermi sulisorineqarsinasup kabelit aqqutaat, kuffiit perusuersartartiillu tamaasa isumannaarsoqqissaarsimavai. Entreprenørillu aamma stationimi matut tamaasa gumminik ussissaqqissaarsimavai.
– Qaqqaq unnuap ingerlanerani annikitsumik anitseqqittarnikuuvoq, taakkuli aarlerinarsimanngillat. Arsakorpassuilli nakkaasut ajornartorsiutaaqaat, Telemi paasissutissiisartoq Malînánguak M. Mølgaard oqarpoq, imaatiullu kabelimut stationip silaannarissarfiisa ajoquserneqarsinnaanerat pinngitsoortinniarlugu Farice arsanik misissuisimanerarlugu, tamakkulu ajunnginnerarlugit.
Tele suli pissutsit malinnaaffigeqqissaarpai.
Telep Kalaallit Nunaanni atuisartunut nalunaarutigaa, imaatigut kabelimut stationeqarfik matuneqassagaluarpat tamanna malugineqassanngitsoq, suli allamik imaatigut Canadamut silarsuullu sinneranut kabelikkut attaveqarmat.