Politikerit oqallorissarlutik pikkorissartut

Politikerit oqaloqatigiinermik oqalunnermilu timip qanoq atorneqartarneranik pikkorissartinneqarsimapput.

Inatsisartut siulittaasuata Josef Motzfeldtip sapaatip akunnerani kingullermi Inatsisartuni ilaasortat oqaloqatigiinnermik pikkorissarnissamut qaaqqusimavai, ilaasortallu amerlanersaat peqataasimapput.

Inge Baaring Copenhagen Business Schoolimeersoq qanoq pitsaanerpaamik oqaloqatigiittoqartarneranik ilinniartitsiartorluni Nuuliarsimavoq.

Ilinniartitsissutigineqarput oqaluinnarluni oqaloqatigeeriaatsit timilu atorlugu saqqummiusseriaatsit. Atuagarsorluni ilinniartitsineq sungiusarnermik malitseqartinneqarpoq, inatsisartunilu ilaasortat suliakkiissutigineqartut atorlugit oqaatsit atorlugit oqaloqatigeeriiaatsit misilippaat. Pikkorissarnerup naggataatigut saqqummiusseriaatsit assigiinngitsut misilerarneqarput.

Justus Hansenip (Demokraatit) pikkorissarneq naammagisimaarlugulu pissarsiviulluarsimanerarpaa:

– Suliffeqarfimmi namminersortumi oqaatsinik atuisorujussuunikuugaluarlunga ilinniartitsineq iluaqutaasorujussuartut isigaara. Eqimattakkuutaarluta periutsit ajornanngitsunnguit atorlugit saqqummiussisarnermik sungiusarpugut.

Inatsisartuni ilaasortat ukiaru tassunga assingusumik pikkorissaqqissapput.

Powered by Labrador CMS