Kangerlussuaq inoqanngilaq
Kangerlussuarmi mittarfik piffissami matumani nalinginnaasuunngitsumik nipaatsorujussuuvoq, arsakut Islandimeersut Danmarkip Kalaallit Nunaatalu akornanni timmisartuussisarneq unitsissimammassuk.
Kangerlussuarmi mittarfiup illutartaavani issiaviit igalaarsuit killinginut inaalitsiterneqarsimapput pujoralakkiartulersimaneralu takuneqarsinnaavoq. Illu tupinnaannartumik inoqanngitsorujussuuvoq. Illu nalinginnaasumik pisuppalummik, oqaluppalummik ilaqutariillu imminnut takoqqikkaangata nuannaatsattarnermik nipisiassaaleqinartarsimangikkaluartoq tupinnaannartumik nipaalluinnartoq, timmisartunillu aallartussanik nalunaarutiginnittoqarpallattarani.
Inersuaq tikiffiusariunilu aallariartortarfik inoqanngilluinnarpoq, inuillu avaanngusuppalullutik cafeteriamukartut saaffiginnittarfimmulluunniit paasisassarsiortut kisimik inussiassaasarput.
Silaannartarput unnuap tungaanut matoqqassaaq
Nutaarsiassalli pitsaassuunngillat. Tusakkat kingulliit imaapput, Danmarkimi timmisartornermik isumannaallisaasoqarfiup Danmarkimi timmisartuussisarneq Kitaani nalunaaqutaq malillugu sapaammi ullaakkut nal. 04.00 matoqqasussanngortissimagaa, taamaattumillu Kalaallit Nunaata Danmarkillu akornanni timmisartuussisarneq uninngagallassaaq. Taamaattumillu Kangerlussuup sinerissallu akornanni timmisartuussisarneq aamma uninngagallarpoq, Air Greenland timmisartunik inoqanngingajattunik timmisitsiumanngimmat. Timmisartoq nassiussanik usisoq kisimi arfininngormat ullaap tungaani Kangerlussuarmiit Nuuliarpoq.
– Nunani tamani inassutigineqartut malittariaqarpagut, taakkulu oqarput Danmarkip silaannartaa aqagu ullaanngornissaata tungaanut matoqqasariaqartoq. Kalaallit Nunaannili aammalu Kalaallit Nunaata USA-llu akornanni silaannaq ammavoq, matusisoqarnerali pissutaalluni Danmarkip Kalaallit Nunaatalu akornanni timmisartuussisoqarsinnaanngilaq, Naviar-imi tusagassiisartoq Jan Eliassen oqarpoq.
Ilaasussat Kalaallit Nunaanni utaqqisut Kalaallit Nunaata silaannartaa ammagaluarpalluunniit Danmarkip silaannartaata ammarnissaanut utaqqisariaqarput, Jan Eliassen nassuiaavoq
Matoqqallunilu qaminngavoq
Takornariartitsisartut aamma timmisartuussisoqannginnera malugisimavaat. Asiartoqartanngilaq, tammajuitsussaarniarfiit matoqqapput, mittarfiup cafeteriaani puugutaasat iloqqaqqissaarsimapput, isumannaallisaasoqarfik akitsuuteqanngitsunillu pisiniarfik matoqqapput.
– Nipaaqaaq. Soorlu pingasunngornerujuaannalersimasoq (pingasunngornikkut Danmarkimiit timmisartoqartannginnami, aaq.) Danmarkimii pisiniartussarpassuugaluit annaavagut. aallartussanllli sullitassqaalunnikuuvugut, Pia Olesen Kangerlussuarmi Hotelip saaffiginnittarfianiittoq oqarpoq.
Kangerlussuarmi Sermitsiap sisamanngornermi ualikkut tikeraarfigisaani ilaasussat utaqqisut susassaaleqerujoorput. Amerlanersaa Danmarkimiissimallutik sinerissamut ingerlaqqittussat. Tallimanngornermi ualikkut amerlanersaat qiimmannginnerulersimapput, avaanngusupput susassaaleqillutillu. Utaqqerusaaginnarsinnaannginnamik seqinnarissorsuummat aneersuartarfimmeeruusaarlutilluunniit pisuttuarsimapput.
.