Aamma tallimanngorpat Atlantikoq qulaallugu timmersartortoqassanngilaq
Qallunaat silaannakkut angallannerata ingerlajunnaarnera tallimanngorpat nangissaaq.
Sisamanngornerup ullaap tungaani ingerlatseqatigiiffiup isumannaallisaaneq pissutigalugu sisamanngornermi Imarpik qulaallugu timmisartuussinissat taamaatittariaqarsimavai.
Air Greenlandip nalunaarutigaa, qaqqap innermik anitsineranit arsakut qanoq sivisutigisumik timmisartuussinermut akornutaassanersut maannarpiaq oqaatigineqarsinnaanngitsoq, kisiannili timmisartuussinernut taartitut timmisartuussinissanik nutaanik Air Greenland pilersaaruteqartoq, taamaalillunilu sisamanngornermi ilaasussaagaluit arfininngornermi aallartussanngorput, aammalu tallimanngornermi ilaasussaagaluit aallarnissaat sapaammut nuunneqarluni.
Ulluni taakkunani marlunni piffissat aallarfiusartut nalinginnaasut atorneqassapput.
Ilaasussat eqqorneqartut – katillugit 900-t missaanniittut – Air Greenlandip sulisuinit toqqaannartumik attaveqarfigineqassapput, imaluunniit Air Greenlandip nittartagaa aqqutigalugu malinnaasoqarsinnaasoq.
Københavnip mittarfiata ullumi sisamanngornermi nalunaarutigaa, sisamanngornermiit nalunaaqutaq 18.00-miit qallunaat nunaata silaannartaani timmisartuussineq unitsinneqassasoq, siuneerpaamillu aatsaat tallimanngornermi nalunaaqutaq 12 aallarteqqissinnaalluni. Tama allappoq dr.dk.
Tamanna pivoq Islandimi qaqqap innermik anitsisup arsakuisa Danmarkimut ingerlaarnera peqqutigalugu.
Københavnip mittarfiani oqaaseqartartup Søren Hedegaard Nielsenip erseqqissaroaa, piffissami tassani mittarfiliarnissaq pisariaqanngitsoq.
Århusip Universitetiani Danmarkimi avatangiisinik misissuivimmi nalilerneqarpoq, ulluni tulliuttuni arsakunik putsut Danmarkip qulaaniissinnaasut taamaalilutik suli silaannakkut angallannermut ajoqutaallutik.
- Timmisartumik angallannermut naliliisartut oqarput, Europap qeqqani avannaanilu nunat aamma taassuminnga sunnerneqassasut, ilisimatooq Jørgen Brandt oqarpoq.
Oqaluttuarpoq, siulittuineq nalorninaateqartoq, sulimi ilisimaneqanngilaq innermik anitsisoq qaqugu unissanersoq.
Anorilli pissusaatigut ilimanerpoq arsakut suli silaannarmiittuarallassasut.