Marlunngorpat aatsaat imarpik qulaallugu timmisartortoqaqqilissaaq
Air Greenland aalajangerpoq sapaammi taartaasumik imarpik qulaallugu timmisartuussinissamik pilersaarutaagaluit ataasinngornermi aprilip 19-ianni ileqquusumik timmisartuussinissaagaluit taamaatinneqassasut.
Islandimi qaqqap innermik anitsisup arsakunik aniatitsinera pissutaalluni Europap annersaani timmisartuussinissaagaluit isumannaallisaanermik peqquteqartumik taamaatinneqarput. Pisortat nalunaarutigaat timmisartuussineq siusinnerpaamik Danmarkimi nalunaaqutaq malillugu sapaatiuppat ullaakkut arfineq pingasunut aallarteqqissinnaassasoq, ilimasaarutilli suli pitsaannginnerat pissutigalugu Air Greenland aalajangerpoq, sapaatiuppat taartaasumik Imarpik qulaallugu timmisartuussinissamik pilersaarutaagaluit ataasinngorpallu aprilip 19-ianni ileqquusumik timmisartuussinissaagaluit taamaatiinnarneqassasut.
– Massaakkut arfininngornermi ualikkuy pissusiusut qiviaraanni Air Greenland marlunngorpat aprilip 20-ianni aatsaat Københavnip Kangerlussullu akornanni timmisartuusseqqilissaaq. Timmisartuutileqatigiiffiullu soorunalimi pissutsit malinnaaffigeqqissaarpai, Danmarkimilu timmisartuussinissaq akuersissutigineqarniariarpat timmisartuutigut tamaasa atorlugit aallarteqqissaagut, Grønlandsflymi paasissutissiisartoq Pia C Bang oqarpoq.
Air Greenlandilli nunatta iluani timmisartuussisarnini ingerlatiinnarpai.
Timmisartuutileqatigiiffik nalunaarpoq Air Greenlandimut ilaallutik Kalaallit Nunaata Danmarkillu akornanni angalanissamut billetsisisimagaluartut billetsitik allanngortissinnaassagaat imaluunniit billetsit akii utertissinnaassagaat, timmisartuussisarnerli qaqgu aallarteqqissanersoq suli nalunarmat billetsinik suli allanngortitsisoqarsinnaanngikkallartoq.
Tallimanngorneq aprilip 23-iat tikillugu imarpik qulaallugu angalanissamik inniminniisimagaluartut tamarmik billetsinik allanngortitsinnaallutilluunniit akinik utertitsisinnaapput.
Air Greenland aprilip 30-iata tungaanut imarpik qulaallugu billetsinik nioqquteqarunnaarallarpoq, massakkullu aamma nassiussanik Kastrup-imut tunniussisoqarsinnaanngikkallarpoq.
– Air Greenlandip sullittakkani tamaasa nittartagaq www.airgreenland.gl atorlugu pissutsinut malinnaaqqullugit kajumissaarpai. Timmisartuussisarneq ingerlaqqileriarpat billetsit allanngortinniaraanni utertinniaraanniluunniit billetsisiffigisimasamut saaffiginnittoqassaaq, Air Greenland ilisimatitsivoq.
Air Greenland telefuunimik saaffiginnittarfimmik pilersitsisimavoq taassumalu normoraa +299 34 33 35. Taanna nunatsinni nalunaaqutaq malillugu nalunaaqutaq 8-miit 20-imut ammasarpoq, imarpik qulaallugu timmisartuussisarnerup aallarteqqinnissaata tungaanut.