Issittup sikua annertusiartupiloorpoq

Nunarsuup affaata avannarliup sikusimanera ukiuni qulinngulersuni marsip qaammataani aatsaat taama annertutigaaq.

Issittup sikua ukiut qulingiluat qaangiummata aatsaat alliartoqqilersimavoq. Assi: AG.

Ilisimatuut paasisimavaat issittup sikua annertuumik siaruarsimasoq, maannakkullu 2001-ip kingornaniilli aatsaat taama annertugigaluni. Beringip imartaani anorit nillertut allamut saannerisigut qaammatit kingulliit ingerlaneranni imaq tusintilikkaanik kvadratkilomererinik annertussusilik sikusimavoq. Marsimi 15,25 million kvadratmeteriusoq sikumik qallerneqarsimavoq.

Taamatut pisoqarnera 'issittup silaata nikerarluni' ilisimaneqartoq Europap avannaani USA-lu kangiani nillertumik anorlertarneranut ilaatigut pisuutinneqarpoq, Politiken allappoq.

Mark Serrezep USA-mi Coloradomi aputip sikullu pissusaanik qitiusumik misissuivimmi (NSIDC) pisortaasup uissuummissutigaa, 2007-mi issittup imartaani sikup aarujussuarsimaneratigut aasami sikup minnerpaaffissimaniilersimanerata kingorna Issittoq taama isseqqilersimatigimmat.

»Ukiorlussimaqaaq - issittullu sikua annertusisimalluni, Europallu avannaani USA-lu kangiani ississimaqaaq, tamannalu issittup issinnerulernerata kinguneraa«, Serreze oqarpoq.

Vicky Pope tuluit silasiorfiani ilisimatooq naapertorlugu issittup silaata nikerarnerata nunarsuup affaani avannarlermi sila sunnersimavaa. »Immap akullersuup silaata kiannerujussuanut aamma sunniuteqarsimavoq, Canadallu kitaanut, ukiuunerani Olympiadeqarnerani aputikippallaarnissaanik navianartorsiortitsilluni«, oqarpoq.

Kisitsisit NSIDC-miittut naapertorlugit Issittup sikua issuungilaq.

»2010-mi sikup annertussusaa ukiunut siuliinut naleqqiutissagutsigu, sikusartoq taama annertutigigaluarluni taamaattoq ukioq manna siku annikinnerulluni«, DMI-mi Imavinnut sikumullu ilisimatusarfimmi ilisimatooq Rasmus Tonboe oqarpoq DMI-p nittartagaani.

Powered by Labrador CMS