Arsakuniit assaalluni anisariaqarpoq

Islandimi qaqqaq innermik anitsisartoq Eyjafjallajökull sapaasiummat anitsiuarsinnartoq qeqertap kujataani arsakunik qasertunik sungaarujuttunilu arsakut nuna qallersimavaat. Arsakunik nuissat taartut talusimagaatsik islandimiut arsakunit aniguiniarlutik nivattariaqarput uumasuutitillu pujoralassimaqisut isumannaatsumut ingerlallugit.

- Tuarsimavarput uumasut toqusarsimasut: hiisit timissallu, Islandimi Røde Korsimiit Solveig Ólafsdóttir nuna arsakumik qallerneqarsimasoq pillugu oqarpoq. Pingasunngormallu nunap immikkoortuani ullussaagaluaq unnuanngorsimasutut ippoq.

Annaassiniartartut oqarput naasorissaasoqarfinnik arsakunik qallersimasunik takuniaasimallutik, nersussuit, savat hiistillu uumasuusivinnut inertinniarneranni ikiuillutik.

Innermik anitsisoqarfimmi - inukitsumi ujarattuunik qaqqajunnalimmi, timmiarmassuaqarfimmi sermersuarmiillu qorlortoqarfimmi - angallanneq tamangajammi unisinneqarsivoq.

Qaqqajunnaat Hjörleifshofip innermik anitsisup kujataa kangianiittut tamamrik qasertuinnaapput. Silaannaq pujoralammik ulikkaarpoq, anoraannguamillu nunaannakkut aqqusergit qaavisigut supineqartarluni. Sumiiffiit ilaanni arsakunik qallersimasoq marullunnguussimavoq issusooq.

Sapaatiummat anorip kujammut timmut nikinneratigut naasorissaasoqarfippassuit arsakunik qallereersimaqisut nutaamik qallerneqarnissaminnik annaanneqarput. Taamatut arsakut nakkaasut unitsiarneranni naasorissaasut uumasut suli narsaatiniittut aanissaannut periarfissaqarput.

- Uumasut isertinneqarnertik iluarinnguatsiaqaat, naasorissaasoq Sigurgeir Ingofsson oqarpoq, hiistiutini arfineq maluk isertereerlugit uumasuusivimminut suli nersussuarnik arfineq marlunnik savanillu 48-nik isertitsiffigineqareersimasumik.

Arfininngormat ulloq naallugu hiistit arsakunik persersumiissimapput, Ingolfssonili oqqittariaqarsimalluni.

- Qimaguttariaqarsimavunga. Aalajangiineruvoq artornartoq, kisianni silaannaq svovleqarpoq, oqarpoq.

- Ullaaq angerlamut uterama qano issanersoq naluara, oqarpoq, nunaatini qasertuinnaq qimerloorlugu.

- Maajunnaqaaq. Narsaatikka ukkiup sinnerani atorsinnaanaviarunanngilakka.

Ilisimatuut naapertorlugit arsakut uumasunut navianartupilussuupput, annertuumik svovlimik akoraqamik.

- Svovlimik iisigaani tamanna saanernut kigutinullu ajoqutaavoq ingammik uumasunut. Arsakut aamma anersaartuutinut aqajaqqumullu ajorutaasinnaapput, Islandimi inuussutissalerinermut oqartussaniit Halldor Runolfsson oqarpoq.

Ilsimatuut sapaatiummat oqarput, Eyjafjallajökullip anitsieran maannakkut annikilliartussasoq ilimagineqartoq.

- Naluarput qaqugu taamaatissanersoq. Ulluni arlalinni ingerlaannarsinnaavoq, kisianni sapaatit akunniunngitsuni, Islandimi geofysiker Magnus Tumi Gudmundsson oqarpoq.

Islandip universiteterianiit geofysikerip Sigrun Hreinsdottirip mianersoqqussutigaa anitsisup eqqaani allanik anitsisoalersinnaanera, Eyjafjallajökullimmi naqitsinerata innermik anitsisartut allat eqeersissinnaavai, soorlu innemrik anitsisartorsuaq Katla, Islandimi anitsisartunit ulorianarnerpaaq, kingullermillu 1918-imi anitsisimasoq.