Nunatsinniit qalipagaq akitsorterunneqartoq
Akitsorterussisarfiup lauritz.comip Emanuel A. Petersen qalipagaa 100.000 kroninik nalilerpaa.
Danmarkimi akitsorterussisarfimmi lauritz-comimi uani sapaatip akunnerani Emanuel A. Petersenip qalipagaa tuniniarneqarpoq, nuantsinniillu qalipakkamut akigitinneqarpoq 100.00 kronit, tassunga ilanngunneqassallutik akitsorterussinermi akitsuut, kiisalu tuniniaasup pissarsiassaa 20 procenti.
Emanuel A. Petersen (1894-1948) 1921-mi nunatsinnut tikippoq umarsuaatileqatigiiffiup A.P. Møllerip umiarsuaataanut ilaalluni. Qalimagaq maannakkut tuniniarneqartoq ateqarpoq »Laura Mærsk kommer med forsyninger«, (Laura Mærsk pajuttoq) angissuseqarporlu 123 x 169 centimeter.
Internetsikkut akitsorterussineq naammassissaaq apriilip 26-ani nalunaaqutaq 21.53, taamaattorli neqeroorut annerpaaq 18.000 kroniuvoq - tassalu nalinerneqarneraniit 100.000 kroniniiit anikinneroqaluni.
Lauritz.com-ip taama qaffasitsigisumik akeqartinneqarnera tunngavilersorpaa: Taama akeqartillugu pissarsiarineqarnissaa tassaavoq misilittakkavut tunngavigalugit assingusunut akigitinneqartartunut assersuussineq.
Sinilersuisartoq assilaarneritorlu Roar B. Christiansen Emanuel A. Petersenip suliaanik ilisimasaqarlaurtuuvoq. Nuummi assiliaarniarfimmini qalipaasup qalipagai 90-ingajaat tuniniarpai, akisunerparlu 140.000 kroninik akeqarpoq.
Roar B. Christiansen sermitsiaq.ag-mut oqarpoq 'Laura Mærsk' 50.000 - 60.000 kronit missaani akeqartoq: – Internetsimi assip pitsaassusaa nalileruminaattarpoq, akianilu apeqqutaasarpoq iluarsaanneqarsimanersoq.
Akitsorterussinerulli takutippaa nunatsinniit assilialiortartup Emanuel A. Petersenip suliai suli soqutigineqartut, aningaasatigullu ajornartorsiornerup nalaani eqqumiitsulianik pisiumasut ikinneruffianni akia allanngorani.
Emanuel A. Petersenip qalipagai nunatsinni pisortaqarfinni allaffinnilu sumi tamani nivingapput, aammalu Nuummi Ilulissanilu katersugaasiviit arlaqartunik katersaqarlutik.