Nassiussat timmisartukkoortussat umiarsuaakkuulerput
Post Danmark aalajangerpoq, timmisartukkut nassiussassat 1.000 kg.-it missaaniittut umiarsuakkut Nuummut ingerlatiinnarniarlugit.
Ilisimaneqartutut Islandimi innermik anitsisoqarnerata kingunerisaanik Danmarkimiit nunatsinnut timmisartunik angalasoqarsimanngilaq.
Københavnimi nassiussassat amerlingaluttuinnari pissutigalugit, Air Greenland-illu ajornassanngippat siusinnerpaamik pingasunngorpat timmisitsilernissaminik nalunaaruteqarnerata kingunerisaanik, Post Danmark maanna aalajangerpoq, timmisartukkut nassiussassat 1.000 kg.-it missaat umiarsuakkut Nuummut ingerlatiinnarniarlugit, TELE-POST nalunaaruteqarpoq.
Nassiussassat timmisartukkoortussaagaluit Aalborg-imiit umiarsuakkut pingasunngorpat 21. april 2010 aallarunneqassapput, Nuummullu 28. april 2010 apuunnissaat naatsorsuutigineqarluni.
Allakkat poortukkallu Nuup avataanukartut timmisartukkoortussat suli København-ip mittarfissuani utaqqisinneqarput.
POST Danmark-ip TELE-POST-illu ingerlaavartumik nalilersuisarnitik ingerlatiinnassavaat, København-milu mittarfik matoqqaannassappat, nassiussat timmisartukkoortussat Aalborg-imiit umiarsuakkut nassiussinnaanissaat eqqarsaatersuutigineqarpoq.