Katlap anitsinissaa annertoorsuarnik kinguneqarsinnaavoq

Qaarluni innermik anitsisartup Katlap Eyjafjallajökullip innermik anitsineranut atatillugu anitsinninnginnissaa kissaatigineqaqaaq.

Islandimi innermik anitsisartoq Eyjafjallajökull tamakkersortoq. Anitsinera Katlamut tuniluutissappat tassani pinngortitap nukii sakkortunerujussuit atulissapput. Assi: Ritzau.

Islandimi innuttaasut pissanngatigaat Eyjafjallajökullip anitsineratigut innermik anitsisartorsuaq Katla Eyjafjallajökullimiit 40 kilometerinik ungasitsigisup eqeersarneqannginnissaa. Taama pisoqassappat Europami silaannakkut angallannermi eqquiinnarani aammali Europami slamut pinngortitamullu anenrtuumik sunniuteqassaaq.

Oqaluttuarisaaneq qiviaraanni ernumanarpoq. Eyjafjallajökullip pingasoriarluni anitsinerani ukiup ataatsip ingerlanerani Katla aamma anitsisarsimavoq.

- Allaanngilaq immeraalluni. Imaanngilaq immeraat pingasoriarluni aappaluttumut unimmat sisamassaa aamma aappaluttuussasoq, Niels Bohr Institutimi sermersualerisoq Jørgen Peder Steffensen oqarpoq.

Innermik anitsisartut siulittoruminaattarput, immaqalu nalaatsornerinnakkut Katla anitsisarpoq Eyjafjallajökull anitsereeraangat.

Innermik anitsisartut marluk immaqa imminnut sunneeqatigiittarnerisa peqqutigaat nunap iluani assigiimmik aallarfeqaramik. Imaapporlu anngaq innermik anitsisikkut kuuttoq nunap iluani ataatsimoorussamik aallerfigigalugu.

- Islandimiut tamanna pimoorullugu nakkutigaat. Katlap eqqaani sumi tamani uuttuutilersuisimapput, nukiillu tamaasa atorlugit paasissutissanik katersuillutillu paasiniaapput, Jørgen Peder Steffensen oqarpoq.

Inuppassuit isumaqarput Eyjafjallajökull annertuumik ajoqusiisimasoq. Ulluni arlalinni Europami silaannakkut angallannermik uninngatitsisimavoq, maannakkulu suli silisimaneqanngilaq arsakunik nuissat aningaasanik qanoq amerlatigisunik akeqarsimanersoq. Taamaattorli taassuma sunniutai Katlap anitsinissaanut naleqqiulugit suunngillat.

- Innermik anitsisartut assigiinngitsut marluupput. Innermik anitsisartut qaarlutik anitsisartut Indonesiamiinnerusarput, innermillu anitsisartut qaarnikinnerusartut. Taakku Islandimiikkajunenrupput. Katlali tassaavoq qaarluni innermik anitsisartoq, sermersualerisoq Jørgen Peder Steffensen oqarpoq.

Innermik anitsisartut qaarnikinnerusut arsakunik 5 - 10 kilometerinik qutsitsisisumut aniatitsisarput. Imaapporlu silaluit arsakunik saliisinnaallutik. Qaarlutilli innermik anitsisartut 20 kilometerit angullugit qutsitsigisumut arsakunik igeriussisarput.

- Arsakunik pujoralak ukiorpassuarni uninngasinnaavoq seqinerlu talullugu. Tamannalu ukiorpassaurni Europami nillernerulersitsisinnaavoq, oqarpoq. .

Ilisimatuut aamma ernumassutigaat innermik anitsinerujussuaqarneratigut tamanna Europami seernartumik silallertitsisinnaasoq pinngortitamut naatitanullu ajorluinnartumik kinguneqartumik.

Powered by Labrador CMS