Timmisartuussisarneq suli uninngatinneqarpoq

Air Greenland aqagu arfininngornermi aprilip 17-ianni suli Imarpik qulaallugu timmisartuussinngikkallassaaq.

Air Greenlandip Imarpik qulaallugu timmisartuussisarnini suli aqagu arfininngornermi aprilip 17-ianni uninngatikkallassavai.

Islandimi qaqqap innermik anitsinera pissutigalugu Danmarkip silaannartaatigut timmisartuussisarneq pisortat sisamanngormat matummassulli Danmarkip Kalaallit Nunaatalu akornanni timmisartuunneqartussaasimagaluartut massakkut timmisartuunneqartussaagaluarput.

Pisortalli nalunaarput qaqqap Eyjafjallajökulip innermik anitsineratigut arsakorpassuit pissutigalugit Københavnip qulaani silaannakkut suli timmisartotoqanngikkallassasoq. Timmisartuussisarneq siusinnerpaamik Danmarkimi nalunaaqutaq malillugu arfininngornermi ullaakkut nal. 8 ammaqqissaneraraluarpaat, ilimasaarutilli suli pitsaanngimmata Air Greenland aalajangersimavoq arfiinngornermi aamma timmisartuussisoqanngikkallassasoq.

Ulluni kingullerni kinguaattorutigineqarsimasunut taarsiullugu sapaatiuppat marloriarlutik timmisartuussisinnaassallutik timmisartuutileqatigiiffik neriuppoq, timmisartuussisarnermuææi qullersaasut isumannaatsumik timmisartuussisoqarsinnaaneranik naliliinissaat apeqqutaassalluni. Ilanngullugulu aamma sinerissap Kangerlussuullu akornanni timmisartuussinissat piariaqartussat pilersaarusiorluarneqarumaarput.

Ilassussat eqqugaasut 900-it missaanniittut saniatigut aamma assartugassanik Københavnimi katersuutiinnartoqarpoq - 30 tonsit missaanniittunik, taakkulu timmisartuussisarneq aallarteqqeriarpat piaarnerpaamik isumagineqassapput.

Ilaasussat eqqugaasut tamarluinnarmik piaarnerpaamik Air Greenlandimi sulisunit atassuteqarfigineqassapput atassuteqarfigineqareersimallutilluunniit angalanissamut pilersaarutinik nutaanik ilisimatinneqarlutik.

Timmisartuutileqatigiiffik telefuunikkut saaffiginnittarfimmik nutaamik pilersitsivoq +299 34 33 35, taannalu nunatsinni nalunaaqutaq malillugu tallimanngormat unnukkut nal. 20-miit, nunatsinnilu nalunaaqutaq malilugu arfininngornermi unnukkut nal. 8-miit 20-imut atorneqarsinnaassaaq.

Powered by Labrador CMS