Maniitsumiit kujammut timmisartuussineq inerteqqutaalerpoq
Angallannermik oqartussat Maniitsumiit kujammut timmisartuussinissaagaluit pingasunngornerup unnuaanut killeqarallartumik unitsippaat.
Islandimi innermik anitsisoqarnerata nassataanik silaannaq arsakunik akulik nunatta kujataanut aamma annguppoq, silaannakkullu angallannermut oqartussat allorniusat sanimukartut 65-at angullugu silaannartaq ullumi marlunngornermi ulloqeqqata siorna matuaat.
Tassa Maniitsumiit kujammut timmisartuussineq inerteqqutaalerpoq, unnuarumut killeqarallartumik.
- Maannamut ilimasaarutit naapertorlugit inerteqquteqarnerup sivitsorneqarsinnaanera ilimanarluinnarpoq, Air Greenland nalunaarpoq.
Ullaaq manna Nuuk-Sisimiut uterlugulu aamma Ilulissat-Qaarsut-Aasiaat uterlugulu kiisalu Kangerlussuaq-Sisimiut-Aasiaat-Ilulissat uterlugulu timmisartuussinerit ingerlanneqarput.
Timmisartuussinissallu Nuuk-Maniitsoq-Kangerlussuaq-Sisimiut uterlugulu timmisartuussinissanut inerteqquteqarnerup nassataanik taamaatinneqarput. Ilaasussallu qaqugu apuussinnaanersut massakkorpiaq oqaatigineqarsinnaanngitsoq, Air Greenland nalunaaruteqarpoq.
Air Greenlandip ilaasussat ullumimiit arfininngorneq ilanngullugu angalasussat bilitsiminnik utertitsinissaannik neqeroorfigai. Taava piumagunik umiarsuarmut sinersortaammut Sarfaq Ittummut bilitsisinnaapput uunga sianerluni 34 91 90. Umiarsuarmi aamma bilitsisisoqarsinnaavoq.
Arctic Umiaq Line-p umiarsuup Nuummiit kujammut aallarnissaa nal. 14.00-ip tungaanut kinguartinniarlugu akuersivoq.
Atlantikoq qulaallugu angallassinerup eqqugaanera allannguuteqanngilaq. Air Greenlandi kingullermik pingasunngormalli nunatta Danmarkillu akornanni timmisartuussisinnaasimanngilaq, Københavnimilu mittarfik qallunaat nunaanni nalunaaqutaq malillugu pingasunngornermi unnuakkut nal. 02 tikillugu matoqqassaaq.
- Air Greenlandip ilaasut ingerlaqqissinnaajunnaarut, unnuinissamut allanik periarfissaqanngitsut, unnuineri nerisaqarnerilu suli akilertarpai, tamannali ataasinngorpat ullaakkut atuukkunnaassaaq, Air Greenland nalunaarpoq.