Islandimiit arsakut annikilliartorput

Islandimi innermik anitsisumiit arsakut Europami silaannakkut angallannermi uivertitsisut maanna nunatsinnut siaruaassimalersoq anikillisimaqaaq. Taamaattoq suli innermik anitsiuarsinnarpoq anngamillu aniasoqarluni, Islandimi ilisimatuut oqarput.

Taamaattorli qanittumi sermersuarmiit annikinnerusumik imermik kuuttoqarneratigut arsakut qummut aniasut annikillisimapput.

- Arsakut annikinnerulersimapput. Europami iluaqutaassaaq, kisianni suli anatitsivoq, Gudrun Nina Petersen Islandimi silasiorfimmiit oqarpoq.

Eyjafjallajökullimiit anngamik qaartarnerit suli ima sakkortutigaat ujararujussuit qummut meterit untrilikkaat igeriunneqartarlutik.

Islandimi politiit oqarput, suli innermik anitsineq annertusoq, aniaffiillu immikkoortut pingasut suli anngamik aniatitsillutik.

Ilisimatuut isumaqatigiissutigaat innermik anitsisup uninissaa suli ilimananngitsoq. Kisianni aamma takussutissaqanngilaq innermik anitsinerup Katlamik sakkortunermik innermik anitsisinnaasumik aallartitsisinnaaneranik.

Ilisimatuut arlaqartut oqaatigaat suli Eyjafjallajökullimiit arsakunik aniasoqassasoq, Europami aamma nunatsinni arsakut qanoq annertutiginissaannut anorip sakkortussusia sammivialu apeqqutaasut.

Arsakut maannakkut 3 kilometerit angullugit portutigisumiipput, tassalu silaannaap ingerlaartup Europamut ingerlatitsiup ataaniillutik. Arsakunik nuissat ilarujussuat aalaavoq arsakuunani, FN-imi silariorfimmmiit nalunaarutigineqarpoq.