Juliep erinarsoqatigiivii nuannerineqaqaat
Tv-kut erinarsornermik unammineq qilanaarineqaqisoq sapaatip akunnerata naanerani ingerlanneqassaaq.
- Julie Berthelsen ukioq manna 'AllStars'-mi erinarsoqatigiinni aqutsisuni sisamaasuni Danmarkimi inunnit ilisarisimaneqarnerpaaq. Piginnasarpassuaqarpoq, arnaaninilu nunatsinneersuuninilu iluaqutigissagunarpai, aammami pinnerlunilu erinagikkami, qallunaq erinarsortartoq Bamse sapaatiuppat erinarsoqatigiit unammissaat sioqqullugu aviisimit BT-mit apersorneqartilluni oqarpoq. Ajugaassusatulli ilimagineqarneq ajornartorsiutitaqarpoq.
- Iluaqutiginiartussaagaluarpaa, taamaattorli isumaluarfigineqarnerujussuaq peqqutigalugu ilungersunartorsiorsinnaavoq. Isumaluarnermi eqquutinniarlugu ilungersungaatsiartussaassaaq. Julie sisamaasunit niuerpalaarnerpaavoq. Unamminerup malinnaaviginissaa pissangarpoq, Bamse oqarpoq.
Julie Berthelsenip AllStarsii aamma allatigut iluaqutissaqarput. Marlunngormat unnukkut Dronning Margrethe Christiansborgimi nerersuartitsinerani innuttaasunut tamanut nittarsaanneqarput. Tassani Julie Berthelsen oaamma Lars H.U.G. marluullutik erinarsorput erinarsoqatigiit tunormioralugit. Dronningip qungujunnera ersaataannerillu eqarsaatigalugit erinarsugaat – Skibet skal sejle i nat – isiginnaartuni nuannerineqaqaaq.