Ilinniartunik siunnersuisartut naapeqatigiilerput
Ilinniartunik siunnersuisartut Piareersarfinneersut, meeqqat atuarfianeersut, inuussutissarsiutinik ilinniarfinneersut, ilinniaqqinnissamut piareersarfinneersut universitetimeersullu 70-it sinneqartut siullermeerlutik isumasioqatigiinniarlutik katersuutissapput.
Tamanna pissaaq majip ulluisa sisamaanni tallimaannilu, Kangerlussuarmi.
Naalakkersuisut anguniagaraat innuttaasut 2/3-ii 2020 nallertinnagu ingerlaqqiffiusumik ilinniagaqareersimanissaat. Anguniakkap taassuma anguniarnerani siunnersortit Kalaallit Nunaanniittut tamarmik ilinniagaqarfiillu assigiinngitsut tamaasa pitarlugit oqaloqatigiinnerulernissaat pingaaruteqartorujussuuvoq.
Siunnersuisartut suliaat amerlasoorparujussuit assigiipput. Ataatsimut anguniagaq tassaavoq ingerlaqqiffiusumik ilinniagaqarsimasut amerlanerulernissaat. Anguniagaq tamanna anguniarlugu ukioq manna maajip sisamaani tallimaanilu Kangerlussuarmi siunnersortit 70-it sinnerlugit meeqqat atuarfianneersut, inuussutissarsiutinik ilinniarfinneersut, ilinniaqqinnissamut piareersarfinneersut, universitetimeersut Piareersarfinneersullu isumasioqatigiissapput.
Isumasioqatigiinneq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup, Inuussutissarsiornermut Sulisoqarnermullu Naalakkersuisoqarfiup aamma Ilinniartuunersiuteqartitsiviup suleqatigiillutik aaqqissuussaraat.