Siriusimi alapernaarsuisut nunami allami
Qimussiussisartut marluk qimuttullu 13-it canadamiut sungiusarneranni "Nunalivut"-mi peqataapput.
Qimussimik alapernaarsuisut Sirius ukiunik 60-inik oqaluttuarisaanerani aatsaat siullermeersumik qimusseqatigiinnik nunami allamiittoqarpoq: Qimusseqatigiit slædehold 3 qimuttullu 13-it ulluni makkunani Canadap avannaani issittup imartaani immap sikuani canadamiut sungiusarneranni "Nanalivut"-mi peqataapput.
Qimusseqatigiit slædehold 3 sapaatiummat apriilip 18-ianni Ellesmere Islandimi canadamiut sakkutooqarfiannut Alert-imit, Robeson Kanalip eqqaaniittumut pipput - Qaanaamit 500 kilometerit missaannik avannarpasinnerusumiittumut. Station Nordimiit Alertimut akunnernik pingasunik sivisutigisumik angalaneq pilersaarutit malillugit ingerlavoq: Qimussit 13-it qimminut karsiniittut, timmisartumi C-130 Herculesimi inissinneqarsimasuni, eqqissisimasimapput, Kalaallit Nunaanni Sakkutooqarfik nalunaarpoq.
Alapernaarsuisut Siriusip sungiusarnermi canadamiut qimusseqatigiit suleqatigai issittumi suleriaatsiminnik imminnut ilinniarniarlutik. Alapernaarsuisut marluullutik qisunnik qimusseqarput oqimaatsunik, pisariaqartunik atortulersorsimasunik, qimusseqatigiilli taakkua marluk pingaarutilimmik assigiinngissuteqarput: Siriusip qimuttut atorpaat canadamiut ranger-iisa snescooterit atortaraat. Tassa imaappoq, canadamiut qimussersunit sukkanerupput, akerlianilli qimuttut issittup silaannaani atussallugit isumannaatsuunerupput.
Sungiusarneq aqagu ataasinngornermi nanginneqaqqissaaq, tamatumalu kingorna qimusseqatigiit Kalaallit Nunaannut timmisartuunneqassapput Station Nordimit Daneborgimut alapernaarsuinertik nangisssallugu, Kalaallit Nunaanni Sakkutooqarfik paasissutissiivoq.