Katsorsaavik namminersortoq kommunet atortarpaat
Imerajuttunik katsorsaasarfik namminersortoq Katsorsaavik Nuummiittoq ukiuni sisamangajanni atuussimavoq, inunnillu aalajaatsunik amerlasuunik takutitsisinnaalluni, katsorsaasarfiup katsorsarsimasaannik, imerajuttunik, ikiaroorajuttunik pinnguarumatuunillu.
Katsorsaasarfik namminersortoq 2007-imi 72-inik katsorsaasimavoq, 2008-mi 85-inik aammalu 2009-mi 74-inik. Katsorsartittut namminersortuni sulisuusut Nuummi Katsorsaaviup maluginiarsimavaa, kiisalu kommuneusimasunit aqqanilinneersut aammalu pisortat suliffeqarfiineersut. Katsorsaasarfilli namminersortoq pisortanit tapiiffigineqarneq ajorpoq, tamannalu naammaginninnginnermik pilersitsivoq.
- Tamatuma saniatigut kommunet siulisitsisullu Nuummi Katsorsaavimmut aallartitsisut katorsartinnermut akiliinerup saniatigut, katsorsartittut angalanerannut najugaqarnerannullu aningaasartuuteqartarput. Qaqiffimmili katsorsartittunut aningaasartuutit taakku Peqqinnissaqarfimmit akilerneqartarput. Katsorsaavik Nuuk malillugu akileraartartut aningaasaataat atorlugit tamanna unammillernermik equngasumik pilersitsivoq, tamannalu naalakkersuisut siuliinut arlaleriarluni saqqummiunneqartarsimavoq, kinguneqanngitsumilli, Katsorsaavik Nuummik pilersitsisut Grethe Kramer Berthelsen aamma Aqqalukasik Olsen tusagassiutinut nalunnaarumminni allapput.