Kommunip aningaasivia imaajarpaat
Kommune Kujalliup karsia qaammatini tulliuttuni pingasuni imaaruteratarsinnaavoq. Pissutsinullu najummassimanartunut pissutaanngilaq aningaasanik piisaarnersuaq.
Kukkusumik isiginninneruvoq, borgmester Simon Simonsen IA-meersumut Lisbeth Søvndhal Pedersenimut paasissutissiilluni oqarpoq. Kommunimi kujallermi inuit 600-t suliffissaaleqipput.
Qanorluunniillu pisoqaraluarpat suliffissaaleqinerup kingunerai akileraarutitigut isertitat ikinnerulernerat isumaginninnermullu aningaasartuutit amerlanerulernerat, suliffissaaleqinikkut angerlarsimaffinni tatineqarluni meeqqat eqqorneqaraangata.
Tamakkua ulloq unnuarlu paaqqinnittarfinnut namminersortunut inissittariaqartarput, tamannalu meeqqamut ataatsimut qaammammut 65.000 koruuninik akeqarluarsinnaavoq. Atugarliornerup kingunerisaanik Kommune Kujalliup isumaginninnermi innuttaasumut ataatsimut 14.464 koruunit atortarpai.
Kommuni nunami tamarmi tamatumunnga aningaasartuuteqarnersaavoq. Ajornartorsiornerup nalaani Kommune Kujalleq pisariillisaasariaqarpoq innuttaasunillu sullissinermi sipaaruteqarluni. Akerlianik tamassuma ingerlalluarnera Simon Simonsenip nuannaarutigaa.
- Tamatumani nuannaarutigalugu oqaatigisinnaavara kommuninit tamanit 2010-mi innuttaasumut ataatsimut ingerlatsinermi aningaasartuutikinnersaagatta innuttaasumullu ataatsimut allaffissornikkut aningaasartuutikinnersaalluta. Taamaattumik angusaqangaatsiarsimaqaagut, Simon Simonsen oqarpoq.