Piniartuuneq illersorlugu
IA sinnerlugu Folketingimi ilaasortaq Sofia Rossen pisuussutinik uumassusilinnik atuineq pillugu nunat tamat akornanni oqalliffimmut nalunaarusiussaaq.
Sofia Rossen ukiap tungaanut Juliane Henningsenimut sinniisuusoq, Washingtonimi Issittumi Inatsisartut peqatigiiffiat ataatsimeeqatigereerlugu immikkut ittumik suliassinneqarpoq.
- Nalunngilara qulequtaq taanna ataatsimiinnermi eqqartorneqassasoq, suliakkerneqarnissarali nalornisimavara. Taamaattumik nunatsinni issittumilu pisuussutinik uumassusilinnik atuineq pillugu nalunaarusioqqunerarama erngerlunga akuersaarpunga, Sofia Rossen oqarpoq, taamaalilluni nunatsinni ilaatigut puisinniarneq arfaniarnerlu illersussallugu.
Ataatsimiinnermi nunat issittumiittut arfineq pingasut peqataapput. Taamaallaat Canada peqataaniarnani nalunaarsumavoq. Pisuussutinik uumassusilinnik atuineq pillugu nalunaarusiaq septembarimi Europa Parlamenti ataatsimiilerpat saqqummiunneqassaaq. Taamaalillu suliaq taanna Sofia Rossenip Folketingimi ilaasortatut suliassaasa kingulliit ilagissavaat, ilimagineqarpormi Juliane Henningsen oktobarimi Folketingimut utissasoq.
Washingtonimi sulinerminut atatilllugu angalanermini aamma World Bankip nunarsuaq tamakkerlugu suliai pillugit paasitinneqarpoq, qallunaallu aallartitaqarsianut pulaarluni.