Inuit amerliartoqqilerput

Sulili angutit arnanit amerlanerupput, nunaqarfinniillu nuuttarneq ingerlaannarpoq.

Inuit amerleriapiloorsimasutut oqaatigineqarsinnaanngillat. 2009-imi 258-inik amerlisimallutik. Assi: Leiff Josefsen.

2009-mi inuit 258-inik amerlisimapput, taamaalilluni januaarip 1-ani 2010 inuit 56.452-jullutik. 2005-miilli aatsaat ikileriartoqarsimanngilaq, taama Kalaallit Nunaanni Naatsorsueqqissaartarfimmiit tusagassiuutitigut nalunaarummi allassimavoq.

Inuit amerleriarsimagaluartut taamaattoq inuit nunasisut nunanut allanut nuuttuniit 189-inik ikinnerupput. Tamanna amerlanerit inunngornerannik illuatungilerneqarpoq, 895-it inunngorsimallutik 438-illu toqusimallutik.

Arnat 26.516-ugamik suli angutinit 29.936-usunit ikinnerupput. Arnat angutillu amerlassutsimikkut nikinganerat ukiorpassuarni taamaassimavoq.

2009-mi inuit illoqarfinniittut nalinginnaasumik amerlisimapput, nunaqarfimmiulli inunnik 309-nik ikilisimallutik. Ullumikkut inuit nunaqarfinni najugallit 9.120-upput. Qaasuitsup Kommuniani nunaqarfinniit inuit amerlanerpaat allamut nuussimapput, tassalu inuit 188-it.

Powered by Labrador CMS