Meeqqat 300-t atuarfinni paasisitsiniaanermi

Ikiuninaqatigiiffup IBIS-ip ukiut arfineq pingajussaa Danmarkimi paasisitsiniaaneq 'Hele Verden i Skole - nunarsuaq tamarmi atuarfimmut' ingerlappaat. Paasisitsiniaanermut atatillugu atuakkiaq Læseraketten (atuarnermut igeriuttagaq) tallimanngorpat marsip 26-ani nunatsinni atuarfinnut anngutissaaq. Ukioq manna atuakkami Angola sammineqarpoq.

'Spark skolen i mål' ukiumi uani ilinniarnissamut paasisitsiniaanermi oqarluartaarutaatinneqarpoq. Taamaattumik Læseraketten 2010-mi allanilu paasisitsiniaanermi sammisassat ukioq manna isikkamik arsaannermut tunngapput. Ukioq mannami nunarsuarmi pissartanngorniuttoqarnissaani paasisitsiniaaneq sakkortunermik isimminneqarpoq, IBIS allappoq.

Sydafrikami VM-ertoqarnissaa peqqutigalugu tapersersuineq taamaallaat meeqqanut atuagassianik atuakkiortunit titartaasartunillu pinngilaq, taakkumi Læserakettenimi oqaasertaritinneqartut assiliartaalu tunissutigisimavaat, atuartullu nunatsinneersut Danmarkimeersullu 190.000-it maannakkut atuagaq atuarsinnaavaat.

Ukioq manna qallunaat isikkamik arsarlutik nunanut allanut unammisartuinit Sydafrikami VM-imi peqataasussanit nunarsuarmi meeqqat tamarmik atuarnissaat pillugu juunimi isertitsisussanit tapersiisoqarpoq.

Isikkamik arsarlutik tusaamasarsuit Thierry Henry, Zinedine Zidane, Sir Bobby Charlton aamma FC Barcelona peqatigalugit qallunaat arsartartuisa VM-imi tv-kut isiginnaartussat tamaasa kajumissaarpaat kikkut tamarmik atuartitaanissaannik piumasaqaatinut atsioqqullugit.

Siunertaavoq nunarsuatsinni meeqqat tamarmik atuartitaanissaat. Tamanna aamma Læserakettenimi siunertaavoq, aamma sammisassani qallunaajaqqat kalaaliaqqallu qaammatini aggersuni akuuffigisassaanni.

Meeqqat 72 millionit ilatik atuariartortut isiginnaaginnarsinnaavaat.

Talerpiup tungaani takusinnaavatit atuarfiit sorliit peqataanersut.