Innaallagissamik pilersuineq akornuserneqanngilaq
Qorlortorsuarmi erngup nukiliorfik imermik amigaateqarpoq, tamannali innaallagissamik pilersuinermut akornutaanngilaq, Qaqortumi Nukissiorfimmi ingerlatsinermut pisortaq oqarpoq.
2009-mi aasap panerneranik ukiuuneranilu nittaattannginneranik taseq innaallagissiorfimmik pilersuisoq tinissimaqaaq.
Tamanna IA-p Narsarmi innuttaasunut ataatsimiisitsinerani eqqaaneqarpoq, tatsip imikipallaarnera innaallagissiorfimmut ajornartorsiortitsisoq oqaatigineqarmat - imalu ajornartorsiutaatigisoq sarfaliuutip aappaa imeq sipaarniarlugu qaminneqartariaqarluni.
Innaallagissamilli pilersuinermut imikinneq ajornartorsiutaanngilaq, Qaqortumi Qorlortorsuarmi nukimmik pilersorneqartumi Nukissiorfinni ingerlatsinermut pisortap sermitsiaq.ag-mut erseqqissarpaa.
Oqaatigaa nalinginnaasumik imeq 128 meterinik ititigisartoq 96 meterinut apparsinnaasoq ingerlatsinermut ajornartorsiutaanngitsumik. Maannakkut imeq 114 meterimiippoq.
– Imeq 96 meterinut apparpat, taava nukiliorfik imermik aallaaveqartumik nukiliorsinnaajunnaassaaq, dieselilu atorlugu ingerlalissalluni, Søren Pedersen oqarpoq.
Eqqortuunerarpaa sarfaliuutit aappaa unitsinneqarsimasoq imeq sipaarniarlugu, tamannali innaallagissamik tunisassiornermut akornutaanngitsoq.
– Tamatut ingelratsineq pitsaaneruvoq imerlu sipaarneqarluni, Søren Pedersen.
naatsorsuutigaa maajimiit aggustimut imeq pisarnermisut 128 meterimik ititigilerumaartoq.
– Asiamiit DMI-miillu siulittuinerit takutippaat aasamut pissutsit nalinginnaajumaartut, tamannalu qilanaararput, Søren Pedersen oqarpoq.