Parnaarussat eqqaanneqarnissamut illersorneqassapput
Parnaarussivik matoqqasoq aasaru sanallugu aallartinneqassaaq, parnaarussivillu kaajallallugu qarmarsualiorneqassaaq qimaasoqarsinnaaqqunagu, aammattaarli parnaarussat avataanit eqqaanneqarnissamut illersorniarlugit. Sermitsiaq atuaruk.
Kalaallit Nunaanni parnaarussivik matoqqasoq eqqarsaatigineqalersimavoq 1994-imi Eqqartuussiveqarnermut Ataatsimiititaliarsuaq aallartimmalli. Maanna piviusunngortinneqassaaq, Eqqartuussiveqarnermut Ataatsimiititaliarsuup 2004-imi isumaliutissiissumminik tunniussineranit ukiut arfinillit qaangiuttut.
– Parnaarussivik matoqqasoq parnaarussanut 76-inut inissaqassaaq. Inissat 40-t pillaamminnik parnaarussivimmi matoqqasumi atuisussatut pineqaatissinneqarsimasunut atorneqassapput. Ullumikkut Herstedvesterimi kalaallit parnaarussat 20-iupput, eqqarsaataavorlu tamakkua tamarmik Kalaallit Nunaannut angerlartinneqassasut pillaamminnillu tamaani atuilutik, taamatut oqarpoq Kalaallit Nunaanni Pinerluttunik Isumaginnittoqarfimmut Naalakkersuisoqarfimmi pisortaq Thomas Nicolajsen.
Parnaarussivik kaajallallugu qarmarsualiortoqassaaq meterinik arfinilinnik portussusilimmik, parnaarussivillu kaajallallugu 100 meteriniit 200 meterit angullugit isumannaatsuunermut illoqannginnersaqassalluni, qarmaalu Herstedvesterip qarmaatut ittuussasoq.
– Herstedvesterimisut ittumik qarmarsualiornissamik aalajangiisoqarpoq pissutigalugu Herstedvesterimi parnaarussat tassaniittussaammata. Aammattaarli pissutigalugu parnaarussat qimaasinnaaqqunagit inuillu avataaneersut isersinnaaqqunagit, imaluunniit parnaarussanik eqqaasseqqunagit. Qimaatitsinaveersaarnermut isertitsinaveersaarnermullu qarmarsuaq illersuutissatuaavoq, aamma immikkoortoqarfimmi matoqqasumi tigummisat parnaarussallu isumannaatsuunissaat eqqarsaatigalugu, Thomas Nicolajsen oqarpoq.
Sermitsiaq nr. 12 atuaruk.