Nuummi politiit ulapittut

Taamaattoq sapaatip akunnerata naanerani sakkortuumik pinerluttoqanngilaq, politiit isumaqarput.

Politiit angutit inuusuttut pingasut inissiami qerisunik tillissimasut tigusaraat. Angutit inuusuttut aamma nassuerutigaat biilinik malrlunnik tillissimallutik, matuersaatinik seqinersiutinillu. Assi: Leiff josefsen.

Angerlarsimaffinni eqqissiviilliornerit aqqanillit, niuertarfinni tillinniarnerit, nakuusernerit pingasut, inissiamut iserluni tillinniarneq, biilimiit tillinniarneq, biilinillu marlunnik tillinniarneq. Tassaapput politiit sapaatip akunnerata naanerani pisunik nalunaarsugaat.

Taassuma saniatigut arfininngornermi sapaammilu politiit biilertut 19-it nakkutilliinerminni unitsippaat, ataaserlu aalakoortoq tigusaralugu..

Inissiamiit qerisunik tillinniarneq

- Tallimanngormat ullaakkut Telep eqqaani politiiniit anguti inuusuttut pingasut tigusarineqarput, Qernertunnguaniit puussiat arlallit annikkaat takuneqareersullu. Tassaappullu inissiat ilaanniit qerititsivimmiit qerisut, politikommissær Niels Nyvang allappoq.

Tallimanngormat ullaap tungaa inuusuttut pingasut politeeqarfiliaanneqarput tassani killisiorneqarlutik. Killissiornermi ilaat nassuerpoq aamma biilit marluk tillissimallugit, matuersaatit seqinersiutillu biiliniittut.

Containerini tillinniarneq

- Ullumikkut paasineqarpoq Nuuk Imip tunuani containerini arlalini tillinniartoqarsimasoq, inunnit suliffeqarfinnillu pigineqartuni. Katillugit containerit 21-it parnaarsimanngillat, taamaattumillu piginittut qinnuigineqarlutik sunik tillittoqarsimanersoq misissoqqullugu, Niels Nyvang allappoq.

Powered by Labrador CMS