Umimmaat silap pissusaanik malussajasut
Uumasut amerlassusaat kiaap allanngortarneranut malinnaasarpoq.
Ukiuni 100-ni kingullerni erloqinaqisumik ilisimatuussutsikkut paasiuminaatsinneqartarpoq: Sooq sermersuaqarnerata naalernerani nunarsuup avannaani uumasut miluumasut annersaat taama amerlarigisut nungussimappat? Itsaq inuit neqitorumartuut piniariaatsiminnik pitsanngortitsiartuinnartut qaarusummi nannut, siisisut meqqullit kiliffaallu nungussimavaat , ilaatigullu ussippaarsuit umimmaallu ikiliserujussuarlugit?
Naagga, ilisimasuussutsikkut paasineqarpoq.
- Ukiut 20.000 matuma siorna Sibiriami umimmaaruppoq suli inuit takkutinngitsut. Kalaallillu Nunaannut inuit umimmaallu ukiut 4.-5.000 matuma siorna takkupput, tamannalu arlaannaatiguluunniit umimmaqassutsimut sunniuteqanngilaq, taama Berlingske Tidendemut nassuiaavoq lektori Tom Gilbert Statens Naturhistoriske Museumimeersoq, nunat tamat akornanni misissuinermi siuttuusoq.
Paasiuminaatsoq DNA atorlugu umimmaat saarngisa ukiunik 60.000-inik pisoqaassusilinnik 150 missaaniittumik misissuinermi paasineqarpoq, taakkulu Kalaalllit Nunaata sermersuaani qillerinikkut paasisanut naleqqiunneqarput, kiisalu itsaq inuit ingerlaarnerannut amerlassusaannullu naleqqersuunneqarlutik.
- Taamaalilluta paasisinnaasimavarput, sila kissatsinnerulersillugu umimmaat ikilisartut. Uumasuupput silap pissumanut malussajasut, Tom Gilbert oqarpoq.