Ballonimik Ilulissat Kangerluat ikaarniaraa
Aasaq ballonimik timmijuaartartoq Frankrigimeersoq Ilulissat kangerluanni Sermermiuniit ballonimik qulaassiniaraluarpoq. Tamannali politiinut unnerluutigineqarpoq.
Aasaq aggustimi pinngortitami nakkutilliisoq Aron Petersen Ilulissat kangerluani nunarsuaq tamakkerlugu erigiagisassami nakkutilliitilluni eqqumiitsumik takusaqarpoq.
Sermermiuni nunami eqqissisimatitami ballonimik silaannaq kissartoq atorlugu angalasartoq Ilulissat Kangerlua ikaarniarlugu atortuminik piareersaaleruttortoq siumorpaa.
Pinngortitamilli nakutilliisup unitsippaa oqarfigalugulu tassannga ballongimik angalasoqaqqusaanngitsoq. Ballonimillu angalasartoq politiinut nalunaarutigineqarpoq nunamik eqqissisimatitamik nalunaarut unioqqutimmagu.
Ilulissani politiit suli misissorpaat ballonimik angalaniartoq eqqissisimatitsinissamut nalunaarummik unioqqutitsisimanersoq.
– Kalaallit Nunaanni misissuinissamut tunngasortaa naammassilerpoq. Kingorna suliassaq Frankrigimut ingerlateqqinneqassaaq ilaatigut ballongimik angalasartup apersorneqarnissaa pillugu. Tamanna qanoq sivisutigissanersoq oqaatigiuminaappoq, politimestereqarfimmi atorfilik Anne-Sophie Lohse oqarpoq.
Ballonimik angalasartoq eqqissisimatitsinissamut nalunaarummik unioqqutitsisimaguni akiligassinneqarsinnaavoq.