Meeqqat Inuunerissut USA-mi ataatsimeersuarnermi

USA-mi ataatsimeersuarnermi tarnip pissusaanik ilinniarsimasut Meeqqanillu Inuunerissunit aallartitat Kalaallit Nunaanni meeqqat illuannik pilersitsinissaq meeqqallu kinguaassiutimikkut atornerlunneqarsimasut katsorsarnissaannut periutsit ineriartortinnissaat pillugit saqqummiipput.

Nunarsuarmi meeqqat illuisa siullersaat annersaallu National Children’s Advocacy Center marsip naalernerani Huntsvillemi Alabamami meeqqat kinguaasiutimikkut atornerlunneqarsimasut pillugit ataatsimeersuartitsivoq.

Nunatsinniit peqataapput Line Frederiksen, Katrine Nathanielsen aamma Louise Mortensen Meeqqanit Inuunerissuniit/Bedre Børneliv (MIBB), kiisalu tarnip pissussaanik ilinniarsimasut marluk namminersortut Naja Lyberth aamma Inuk Bourup-Nielsen inuit allat 900-t missaat ilaatigut USA-miit, Australiamiit Norgemiillu peqatigalugit.

MIBB-ip 2009-miilli nunatsinni meeqqat illuannik pilersitsisoqarnissaa sulissutigaa. Ataatsimeersuarnermi peqataaneq suliamut tassunga ilaavoq.

– Workshopitsinni nunanit allanit peqataasut amerlapput uagutsitut siullermeerlutik meeqqat illuanik pilersitsiniartut. Qeqertani avinngarussimasuni Manerassuarmi, Irlandimi imaluunniit Kalaallit Nunaanneersuugutta tamatta assigiimmik ajornartorsiuteqarpugut, ikioqatigiilluta kivikkusutatsinnik. Nunarsuaq tamakkerlugu attavissatsinnik pissarsivugut, MIBB-imi siulittaasoq Line Frederiksen oqarpoq.

Kalaallit tarnip pissussaanik ilinniarsimasut marluk katsorsaariaasertik kulturimut naleqqussarsimasoq pillugu saqqummiipput, tamannalu amerikamiunit soqutigineqarlunilu nersorniarneqarpoq, Line Frederiksen oqarpoq.

Katsorsaariaaseq kalaaliaqqanut, kulturiannut, oqaasiinut inuiaqatigiinullu tulluarsagaavoq, Tasiilamilu meeqqat inuusuttullu 60-it kinguaassiutimikkut atornerlunneqarsimasut katsorsarnerannit misilittakkat tunngavigalugit ineriartortinneqarsimasoq.

– Paasivarput kalaallit meerartaasa katsorsarneranni tamatigut atorsinnaaneq ajorlutigik katsorsaariaatsit oqaatsit tunngavigalugit ingerlanneqartut nunanullu kitaaniittunut tunngassuteqartut, taama kalaallit marluk tarnip pissussaanik ilinniarsimasut Inuk Bourup-Nielsen aamma Naja Lyberth oqaluttuarput.

USA-mi suleqatissaminnik attavittaartorput, qaammatikkaartumillu oqarasuaatikkut videolu atorlugit ataatsimiinnermi peqataasarnissamut qaaqquneqarlutik, taamaalillutik suliaminnut tunngatillugu paasisanik paarlaasseqatigiillutik meeqqat kinguaasiutimikkut atornerlunneqarsimasut katsorsarneqartarnerannut atatillugu.

– Amerikami tarnip pissussaanik ilinniarsiumasoqativut suleqatigalugit neriuutigaarput nunatsinni meeqqat illuanik pilersitsinissaq siuarsarsinnaallutigu, minnerunngitsumillu kalaallit meerartaanik katsorsaanermi qulakkeerneqarluni taakku atugarisaat tunngavigalugu neqerooruteqarsinnaaneq, Inuk Bourup-Nielsen aamma Naja Lyberth oqarput.

2009-mi novembarimi Inatsisartut aalajangerpaat, nunatsinni meeqqat illuanik pilersitsisoqassasoq.

Powered by Labrador CMS