Internetikkut ilinniartitsineq sammineqalerpoq
Telep aaqqissugaanik internetikkut atuartitsineq ilinniartitaanerlu ataatsimeersuassutugineqassaaq.
Tele Greenlandip Namminersorlutik Oqartussat, kommunit nunatsinnilu suliffeqarfiit allat peqatigalugit Sarfarissoq II ingerlatilerpaa, imaatigut kabelimi sakkortusaavinnilu piginnaasap annertusineratigut periarfissat tamatumuuna sammissallugit.
Atuartitsineq, ilinniarneq aamma piginnaasanik qaffassaaneq tassaapput TELEp annertuumik aningaasaliiffigisaanik atuiffiulluarsinnaasut. Sarfarissoq II-p taamaammat qulequtaraa ”e-ducation”.
Isumasioqatigiinneq Nuummi Katuami ingerlanneqassaaq ulluni 27. – 29. april, oqalugiartussat pissanganartut suliffeqarfiillu attaveqaateqarnerup internetillu Kalaallit Nunaanni siunissami atuartitsinermut ilinniartitsinermullu qanoq atorneqarsinnaaneranik tamatumuuna saqqummiussissallutik.
Ataatsimeersuarnissamut piareersaatitut 2009-mi novemberimi suleqatigiissitaliortoqarpoq arfineq-marlunnik, ullumikkut sumi inissisimanitsinnik misissuisussanik aammalu ilinniagaqarnermik ingerlatsinerup qanoq iliorluni pitsaanerpaamik teknologii atorlugu periarfissaasunik pioreersunik atorluaasinnaanermik misissuisussanik. Suleqatigiissitat attaveqaateqarnermi teknologiimik atorluaanerup sunniuteqarluarnissaa pillugu sutigut suliniuteqartoqartuarnissaanik siunnersuusiussapput.
– Sarfarissoq II pissanganartunik nutaarsiassaqarfiujumaarpoq, e-ducationillu iluani inuit saqqumilaarnerit ilaannik oqalugiartoqarumaarluni. Kalaallit Nunaanni suleriaaseq pitsaanerpaaq qimerluussavarput uagullu imminut isumassarsiorfittut atorumaarluta. Aamma aporfiit uagut nammineq maani suliffitsinni nalunngisagut qimerluussavagut, aamma qanoq iliorutta ingerlaqqinnissarput oqaloqatigiissutigissallugu, Tele Greenlandimi pisortaaneq Brian Buus Pedersen oqarpoq.
Isumasioqatigiinneq Sarfarissoq II-mik taaguuteqartinneqartoq, 2008-mi aggustimi Nuummi isumasioqatigiinnersuup siulliup Sarfarissoq I-ip paasissutissiinermut attaveqatigiinnermullu teknologiip (IKT-p) iluani Kalaallit Nunaanni siunissami sunik periarfissaqarneranut tunngasunik imaqartup, nanginneraa.