Sulisoq saassukkaa
Angut kalaaleq 32-nik ukiulik piffissami aalajangigaanngitsumik tarnimikkut napparsimasut napparsimmavianiittussanngortinneqarpoq sulisumik sakkortuumk saassussisimanini peqqutigalugu.
Sassussineq pivoq aggustimi 2009 Sct. Hans Hospitalimi Roskildemiittumi.
Angut 32-nik ukiulik Qaqortumii peroriartorsimavoq 'ilungersunartumik atugassaqarluni' 'meeraallunilu aqukkuminaalluni', tallimaniillu ukioqarluni immineertinneqartarsimalluni, taama allappoq Politiken 32-nik ukiulik eqqartuunneqarmat peqataasimasoq.
Ukiut qulit matuma siorna siulermik eqqartuunneqarpoq ilaatigut nakuusersimanini kanngutsaatsuliorsimaninilu peqqutigalugit. Ilinniarsimanemrinut allagartaqanngilaq ilinniarniaraluartarsimallunilu. Danmarkimi Christianiamut kajungerisaqarsimavoq, tassani ullut tamaasat imertalerluni hashitortalerlunilu.
Ukiut kingulliit qulit arlaleriarluni tarnimikkut nappaatillit napparsimmavianniitinneqartarsimavoq, 2004-milu paranoid skizofrenimik napaateqartutut eqqartuunneqarluni. Arlaleriarluni angerlartinneqartarsimavoq napparsimasup allap inaanik taarserlugu.
Tamatigut atornerluisuullu aqqusinermi inuunermut utertarpoq. Pisortanillu tapiissutaasut imigassamut hashimullu atorlugit qaammatip ilaani nungukkaangata pinerlunnialersarluni.
Arlaneriarluni angutit angerlarsimaffianniit anisitaasarpoq, kammartujunera pillugu ajattorneqartarluni.
Napparsimmavimmulu uteqqikkaangami ima sanngiillisimasartigaaq, tassaniinnera allaaneq ajorluni nerisaqarluni iisartagaqarlunilu peqqissarneq.
– Tarnip pissussaanik katsorsaanerup iluani tamanna takornartaanngilaq. Napparsimasut uteqqiasut ilagiinnarpaat, anisinneqariarluni uteqqisoq, tarnimigulli nappaataata iluamik katsorsarnissaanut periarfissaqartinneqarneq ajorluni.
– Iluamik katsorsarneqartartuuguni tamaaniissanngikkaluarpoq, peqqissaasut ilaat oqarpoq, angut 32-nik ukiulik innartitaagaangat passussisartoq.
Københavns Byretimi suliaq assigiinngitsorpassuarnik imaqarpoq, ilamernga taamaallaat Sct. Hansimi saassussineranut tunngasuulluni. Katillugit pisuni 12-ni angut 32-nik ukiulik pisuuvoq. Ilaatigut arnaq arabiamiu naartusoq saassussimavaa, angutillu naapitami qingaa napisimallugu.
Eqqartuussisut unnerluussisup piumasaqaatai malippaat, angullu 32-nik ukiulik piffissami aalajangigaanngitsumi tarnimikkut nappaatillit napparsimmavianiittussasut eqqartuullugu.
Tamannalu imaappoq, tassani innangassaaq siunissami aatsaat eqqartuussinermi nalilerneqarpat anisinnissaa illersorneqarsinnaasoq anisinnaalluni. Kingorna Taarsiissuteqarnissamut ataatsimiititaliami aalajangerneqassaaq arnaq sulisoq saassunneqarnini peqqutigalugit taarsiivigineqassanersoq.
Saassussineq ima sakkortutigaaq, arnaq ullumikkut sulisinnaanani sutigullu tamatigut ikiorneqartariaqarluni amma atisalersornissamut.