Namminersulernissaq ungaseqaaq
Misissuinerit nutaat naapertorlugit ukiut 50-it sivisunerusorluunniit qaangiuppata nunatsini ima isertiaqartigilersimassaagut Danmarkimiit ataatsimoortumik tapiissutit 3,8 milliardit pisariaqartikkunnaarlugit.
Siunnersuisarfiup NIRAS-ip Kalaallit Nunaanni Sulisitsisut Peqatigiiffiat sinnerlugu misissuinerianni sammineqarpoq, Danmarkimiit ataatsimoortumik tapiissutit 3,8 milliardit nunatsinniit pisariaqartinneqarunnaassappata suut pisariaqarnersut.
Aamma atuaruk: Namminiilivinnissaq ukiut 50-it qaangiuppata aatsaat pisinnaasoq
Kalaallit Nunaata aningaasatigut siunissaanut tunngatillugu misissuinermi periarfissat marluk takutinneqarput, taakkunanilu isumalluartumik takussutissat naapertorlugit Kalaallit Nunaata Danmarkimiit ataatsimoortumik tapiissutit pisariaqartittuartussaavai.
Isumaluartumik takussutissaq taaguuteqarpoq suut tamarmik ajunngitsumik ingerlasuuppata. Tassani pisariaqarpoq ilaatigut Kalaallit Nunaata suli annertunerusumik aalisarnikkut isertitaqarnissaa, aluminiumik aatsitsiviliortoqarsimalluni angisuumik, aatsitassarsiorneq ima ineriartortigisimalluni suliffissat amerlanerit pilersinneqarsimallutik akileraarutitigullu isertitat annertunerullutik.
Tassani aamma takorloorneqarpoq kalaallit illoqarfinnut ikinnerusunut katersuussimassasut, taamaalilluni tamanna sipaarfiulluni.
– Tamanna suliassaavoq anenrtooq. Nunanut allanut tuniniaaneq ullumikkoorniit 20-iaamik annertunerussaaq, tamannalu piffissap sivisuup ingerlanerani aatsaat pisinnaavoq, sulisitsisut peqatigiiffianni pisprtaq Henrik Leth oqarpoq.
Misissuineq naapertorlugu ukiut 50 qaangiuppata imaluunniit sivisunerusoq, kalaallit namminerlutik ima isertitaqalersimassasut Danmarkimit avissaarnissaminnut piareerlutik, siorna namminersulernikkut taama periarfissaqalersimanertik tunngavigalugu.
– Kalaallilu Nunaata nunanut allanut tunngasut tigussagunikkik nunatullu namminersulerlutik, taava tamanna akisunerussaaq, Henrik Leth oqarpoq.
Erseqqissarpaa misissuinermi taamaallaat isiginiarneqartoq ataatsimoortumik tapiissutit pisarunnaanissaannut susoqartariaqarnersoq. Tassani misissorneqanngilaq susoqartariaqarnersoq Kalaallit Nunaanni annertunerusumik ineriartortoqassappat atugarissaartoqarlunilu, ataatsimoortumik tapiissutit pisarunnaarlugit.
Aamma atuaruk: Aningaasaqarnikkut namminersulernissaq neriuutissartaqarpoq
Misissuinermi erseqqissarniarneqarpoq, Kalaallit Nunaanni annertuumik uuliaqarsinnaanera gasseqarlunilu ima pissarsiariuminaatsigisunik taakku tamaallaat tunngavigalugit periusissanik pilersaarusiornissaq nalorninartoqarluni.
Nalunaarusiaq tamakkiisoq qallunaatut inernerilu kalaallisut qallunaatullu allassimasut aaneqarsinnaapput uani talerpiup tungaani.
Aamma Sermitsiaq nr. 13 atuaruk ...