MIPI-p siunissaa qulakkeertariaqarpoq

MIPI-mi siulersuisut Naalakkersuisut meeqqanut inuusuttunullu tunngasunik nassuiaataata Inatsisartut ukioq manna upernaakkut ataatsimiinneranni saqqummiunneqarnissaa pissangallutik utaqqivaat.

– Naalakkersuisulli siunnersuisarfimmik, inuiaqatigiinnut attuumassuteqartunik Kalaallit Nunaanni meeqqat inuusuttullu pillugit ilisimasanik pilersitsiviusarlunilu pilersuiviusussamik eqqarsaatitik nassuiaateqarfiginiarpaat. Siulersuisut MIPI suliffittut, meeqqat inuusuttullu atugarisaannik pingaartitsisuusoq aammalu misissuinerni meeqqanik aallaaveqartartuusoq politikkikkullu naqisimaneqanngitsoq, ingerlatiinnarneqarsinnaanissaata paasinissaa qilanaaraat.

MIPI-p siulersuisuisa nuannaarutigaat naalakkersuisooqatigiinnissamik isumaqatigiissutaanni meeqqanut inuusuttunullu tunngasutigut ilisimasat salliutimmatigik, 25 mio. koruunillu ingerlatanut aalajangersimasunut immikkoortissimammatigit.

– Tamanna ima paasivarput meeqqat inuusuttullu pillugit ilisimasat tamatigut uppernarsaasersorneqarnissaannik pissarsiarineqarsinnaanerannillu piumasaqartoq, taamaalillutik aalajangiinerit pitsaanerpaamik angusaqarnissaq anguniarlugu pitsaasumik tunngavissaqarsinnaalersillugit, siulersuisut allapput.

Siulersuisut isumaqarput MIPI pillugu inatsisit nutarterneqartariaqartut, MIPI-llu aningaasaqarnera naleqqussartariaqartoq, inatsit maannamut atuuttuusoq naleqqukkunnaarsimammat.

– Naalakkersuisut siunnersuinermik ingerlatsiviusumik, peqatigitillugu inuiaqatigiinnut attuumassuteqartunik Kalaallit Nunaanni meeqqat inuusuttullu pillugit ilisimasanik pilersitsillunilu pilersuisussamik eqqarsaatersuutigigallagaat siulersuisut isumaqataafigaat. Tamannalu pilluni neriuutigaarput MIPI-p aaqqissuussaaneranut, akisussaaffeqarneranit inissisimaneranut il.il. tunngasut ukiup matuma ingerlanerani aaqqiivigineqassasut, MIPI-p siulersuisui ukiuumoortumk nalunaarumminni allapput.