Flying Superkids nunatsinnut
Meeqqat takutitsisartut tusaamasat Nuummut, Sisimiunut Ilulissanullu tikeraassapput, Air Greenlandip ukiunik 50-iliilluni nalliuttorsiorneranut atatillugu.
Flying Superkids arfininngorpat apriilip 17-ani Nuummi Inussivimmi workshopertitsissapput, apriilip 20-ani Sisimiuni Minihallimi, Ilulissanilu timersortarfimmi apriilip 22-ani.
Nuuk workshopertitsisuuvoq Katuaq, tassani meeqqat tallimaniit 14-inut ukiullit peqataasinnaallutik.
Flying Superkids eqaarsaartartoqatigiittut nalinginnaasutut aallartipput, ukiulli ingerlanerini nunarsuaq tamakkerlugu tusaamasatut isiginnaartitsisartunngorsimallutik.
Niviarsiaqqat nukappiaqqallu qulit, 8-niit 24-inut ukioqartut eqaatsuliorlutik takutitsissapput isiginnaartunut aqajannguumminartumik.
Takutitsinermi videot, qulliit allallu seqersillugit atorneqassapput, taakkulu aliikkusersuinernik assigiinngitsunik imaqassapput, soorlu qitinernik immikkut ittunik, silaannakkullu pissinnernik tupinnaannartunik.