Kinamiit takornariat Illoqqortoormiuniit aallarsinnaanngillat
Silap ajornera peqqutigalugu Hong Kongimiit takornariat 20-t Illoqqortoormiuniit aallanreq ajulerput. Nanu Travelip Air Iceland illoqarfimmik pingaartitsinnginnerarpaa.
Siullermik Kinamiit Illoqqortoormiunut takornariartoqarpoq, illoqarfimmilu takornariartitsiviup Nanu Travelip kangiani nunami angisuumi angalatitsivinnik suleqateqarneq isumalluarfigaa.
Nanu Travelilli pisortaata Martin Munckip ernummatigaa, misilittakkat siuliit Kalaallit Nunaata tunuanut avinngarussimaqisumut takornariarnissaq ornigiunnaassagaat.
Kinamiimmi takornariat siulliit 20-t silap ajornera peqqutigalugu aallarneq ajuleqqapput, silalu pitsanngorpat aatsaat immaqa sisamanngornermi aallaqqissinnaallutik.
Martin Munch sermitsiaq.ag-mut oqarpoq Air Icelandip eqarneratigut takornariat aallartinnaanngitsut.
– Takornariat poorskip aappaani silagissorsuugaa aallarsimasuugunik, taamatut inissisimassanngikkaluarput, Martin Munck oqarpoq.
Marluungornermi silap ajornissaanik Air Iceland kalerrissimasuuguniuk, siunnersuutigalugulu takornariat ataasinngornermi aaneqassasut, taamaalillutillu Frankrigimiit, Tysklandimiit Danmarkimiillu takornariat allat Reykjavikimi utaqqisut aamma Illoqqortoormiunut anngulutik.
Martin Munckili naapertorlugu Air Iceland timmerusussimanngilaq Nerlerit Inaani mittarfiup poorskip aappaani matoqqanera peqqutigigunarlugu. Kingorna timmisartuutileqatigiit nassuiaatertik allanngortippaat timmisartussaqannginnerarlutik.
– Air Icelandip tunngavissaqanngitsumik itigartitsineratigut Kinami Tunumut takornariartitsisarnissamut periarfissatsialak samanginneqarpoq, Martin Munck oqarpoq.
Tamanna Illoqqortoormiunik pingaartitsinnginnertut isigaa, isumaqarlunilu attaveqarnermut naalakkersuisoqarfimmiit Airt Icelandimik kiffartuussinissamut isumaqatigiissut misissoqqinneqartariaqartoq.
Air Icelandimit oqaaseqartitsinissaq iluatsissimanngilaq.
Poorskikkunni Kinamiit takornariat illoqarfiup eqqaani ulluni sisamani qimusserartinneqarsimapput. Tamanna piniartunut 60.000 kroninik insertitsissutaavoq.
Illoqqortoormiuni Pilersuisoq poorskip aappaani ammartinneqartariaqarsimavoq, kinamiut nerisinnaaniassammata. Marlunngornermi pisuttuartinneqarput, qamuteralatsinneqarlutik oqalufiarfigineqarlutillu.