Erngup nukinganik nukiliorfiit tallimat naammanngillat
Qasigiannguanit erngup nukinganik nukiliorfiup Aasiaat aamma pilersussavaa.
Pingasunngormat Sisimiuni erngup nukinga atorlugu nukiliorfiup atoqqaartinneranut atatillugu angallannermut, ineqarnermut attaveqarnermullu naalakkersuisup Jens B. Frederiksenip siunissami piujuartitsilluni nukiliornermut tunngatillugu pilersaarutit saqqummiuppai.
– Erngup nukinganik nukiliorfiit tallimat naammanngillat, Jens B. Frederiksenip erseqqissarpaa, taamaattumik erngup nukinganik nukiliornissamut misissuinissanut naalakkersuisut ukiumut milliuunilikkaanik aningaasaliisarput.
– Aatsaat taamaaliorutta siunissami suli annertunermik piujuartitsineq aallaavigalugu nukissiuuteqarnermik anguniakkavut naammassiniarsinnaavagut.
Sisimiuni erngup nukinga atorlugu nukiliorfiliornikkut maannakkut illoqarfit tallimat pinngortitamut illersuisumik nukimmik pilersorneqalerput: Tasiilaq, Qaqortoq, Narsaq, Nuuk aamma Sisimiut.
Aasamut Ilulissat
– Ilulissani erngup nukinga atorlugu nukiliorfiliortitsinissaq pillugu suliffeqarfik Pihl & Søn attaveqarfigisimavagut, nukissiuuteqarnermut pisortaq Svend Hardenberg sermitsiaq.ag-mut oqarpoq.
Erngup nukinganik nukiliorfiliassaq sananeqassaaq Ilulissat avannamut kangiani 50 kilometerinik ungasitsigisumi kangerliumarngup Qinnguata Avannarliup tatsillu Paakitsup Akuliarusersuata akornanni.
Suliaq juunimi aallartissaaq 2013-imilu atulissalluni.
Erngulli nukinga atorlugu nukiliorfiliorneq tassunga killeqassanngilaq. Qasigiannguani erngup nukinga atorlugu nukiliorfiliornissaq Nukissiorfiit pilersaarusiorpaat, taassumalu aamma Aasiaat nukimmik mingutsitsinngitsumik pilersussavaa. Taassuma sananera aallartissaaq 2013-imi Ilulissani nukiliorfissaq naammassippat.
2006-mi Nukissiorfinni nukiup 40 procentia erngup nukinganik pilersitaavoq. Nuup kujataani Utoqqarmiut Kangerluarsunnguani sarfaliuutit pingatsernerisigut Sisimiunilu erngup nukinganik nukiliorfeqalernikkut tamanna 60 procentimut qaffappoq. Ilulissanilu nukiliorfik 2013-mi atulerpat 70 procentimut qaffassaaq.