Sisimiormiup ataatsip CO2 3,8 tonsi sipaartassavaa
Qeqqata Kommuniani borgmesterip Hermann Berthelsenip pingasunnogrmat nunatsinni erngup nukingannik nukiliorfiit sisamassaat atoqaartippaa.
Hermann Berthelsenip pingasunngormat ullaap tunngaani Sisimiut eqqaani erngup nukinganik nukiliorfimmut qalersaq aappalaartoq qiorpaa, tassanilu aamma avatangiisit illersornerunissaanut annertuumik alloriartoqarneranik takussutissaavoq.
– Sisimiunut uuliamik pisisarneq ukiumut 6.300 tonsinik appariassaaq, tamannalu inunnut ataatsiakkaanut agguaqatigiissillugu 1.145 literiuvoq, Hermann Berthelsen oqarpoq.
Nukissiuutit mingutsitsinngitsut atulernerisigut illoqarfiup CO2-mik aniatitsinera ukiumut 21.000 tonsinik appariassaaq, tassalu Sisimiormiunmut ataatsimut agguaqatigiissillugu CO2 3,8 tonsi. Hermann Berthelsenili isumaqarpoq CO2-mik aniatitsineq suli apparnerusinnaasoq.
– Alloriarnerup tullerisariaqarpaa Naalakkersuisut illuni ataasiakkaani uuliamik kiassaatit taarsersornissaannut aqqutissiuinissaq, avatangiisit illersorneroqqullugit, ilaatigut seqerngup kissaanik tigooraasuliinikkut.
Ingerlalerpoq
Sisimiuni erngup nukinga atorlugu nukuliorfik Islandimiit entreprenørit Ístakip suliaraa, piffissarlu tunniussiffissaq sioqqullugu naammassineqarluni.
Novembarilli 15-ani innaallagissulerpoq, novembarillu 16-ani Sisimiuni innaallagissiorfik uuliatortoq qaminneqarpoq.
– Erngup nukinganik nukiliorfik ulluni 142-ni ingerlareerpoq, ullunili taamaasaat sisamani affarmilu qamittoortoqarpoq, suliamik aqutsisoq Gudmundur Thórdarson sermitsiaq.ag-mut oqarpoq.
Qamittoornerit ilaat pilersaarusiugaapput; ilaalli kukkunermik peqquteqarlutik, maannakkut aaqqinneqarsimalersunik.
Milliardip affaa
Qallunaat suliffeqarfiutaat Pihl & Søn, 2006-imi erngup nukinganik nukiliorfiliornissamut atatillugu suliariumannittussarsiuussinermi ajugaasuupput, suliassarlu taanna suliffeqarfiutiminnut Ístakimut suliakkiutigaat.
Juunip 7-ani 2007 Kangerluarsuup Ungalliup qinnguani assaassut siulleq nunamut tulaanneqarpoq, taamaniilli agguaqatigiissillugu sulisut 70-80-it nukiliorfiliornermi sulipput.
Nukiliorfik tatsip Tasersuup eqqaani sananeqarpoq Sisimiut avannaatungaani 27 kilometerinik ungasitsigisumi.
Nukiliorfiliorneq tamakkiisoq akeqarpoq milliardip affaanik, tatsimiit kilometerinik tallimanik takitigisumik sulluliorneq ilanngullugu kiisalu Sisimiunut innaallagssap aqqutai 27 kilometerit ilanngullugit.
Nunatsinni nukissiuuteqarnermut suliffeqarfiup Nukissiorfiit nalilerpaat, ukiut 15-nit 20-llu ingerlanerani erngup nukinga atorlugu nukiliorfik imminut akilersimassasoq.