Norskehavemi uuliamik nassaartoqarpoq

Nunatta Norgellu akornanni immami Norge uuliamik ujaasilluni qillerinermi iluatsitsivoq.

Norgemi Statoil uuliamik nassaaqqippoq. Assi: A.P. Møller-Maersk.

Norgemiut uuliasiorfissuat Statoil uuliamik 6-10 mio. kubikmeterimik 1-3 mia. kubikmeterimillu naturgasimik Norskehavemi Norgep nunattalu akornanni nassaarpoq.

Taama allapoq Reuters Norgemi uuliamut oqartussaasunit paasissutissat unnerlugit.

Siunissamili uuliap akia isumalluarnanngilaq.

Qaammatini 18-ini uuliap akia qaffasinnerpaaffissamineereerluni appariartoqqilerpoq. Niuerfimmi upperineqarunnaarpoq USA-mi aningaasaqarnikkut siuariartorneq uuliap piumaneraneranut sunniuteqangaassasoq, Bloomberg allappoq.

Qularisassaanngilarli siunissami guultip qernertup naleqarluarlernissaa uuliamik pisuussutit ikiliartortillugit. Taama pisoqarneratigut nunarsuarmi uuliasiorfiit Kalaallit Nunaata imartaa isiginialerpaat. Cairn Energyp naatsorsuutigaa aasamut kitaani sinerissap qanittuani qillerilernissartik. Taassuma saniatigut Namminersorlutik Oqartussat maannakkorpiaq kitaata sineriaanut qanittumi uuliasiorfissasut blokkit 14-it neqeroorutigaat. Neqeroorutieqarnissaq tulleq pissaaq 2012-mi tassanilu pineqarpoq Tunup imartaa - tassalu nunatta Norgellu akornanni imaq, uuliamik nassaarfioqqammersoq.

Powered by Labrador CMS